Asiya İnkişaf Bankı (ADB) “Mərkəzi və Qərbi Asiyada sosial müdafiə xidmətlərinin göstərilməsinə özəl sektorun cəlb edilməsi” texniki yardım layihəsi çərçivəsində 300 min ABŞ dolları məbləğində vəsaitin ayrılmasını təsdiqləyib.

“Report” ADB-yə istinadən xəbər verir ki, 2026-cı ilin sonunadək həyata keçirilməsi nəzərdə tutulan layihə regionun 9 ölkəsini, o cümlədən Azərbaycanı əhatə edəcək.

İştirakçı ölkələrin hökumətləri işçi heyəti, ofis sahələri, inzibati xidmətlər və digər qeyri-maddi resurslar şəklində dəstək göstərəcək.

"Regionun sosial müdafiə sistemləri xidmətlərin səmərəsiz, əhatə dairəsinin məhdud, hədəfləmə mexanizmlərinin zəif olması, resurs çatışmazlığı və böhranlara inzibati hazırlığın aşağı səviyyədə olması kimi bir sıra problemlərlə üzləşir. Həssas əhali qrupları - qadınlar, yaşlılar, gənclər, valideynlərini itirmiş və valideyn himayəsindən məhrum olmuş uşaqlar, məcburi köçkünlər, qaçqınlar, evsizlər və əlilliyi olan şəxslər üçün bu xidmətlərin əlçatanlığı qənaətbəxş deyil.

Bununla yanaşı, dövlət müəssisələri resurs çatışmazlığı, köhnəlmiş infrastruktur, bürokratik maneələr və “bir pəncərə” mexanizmlərinin olmaması ilə üzləşir. ADB-nin layihəsi özəl sektorun təcrübəsi və innovasiyaları hesabına bu problemlərin aradan qaldırılmasına yönəlib və çevik, iqtisadi cəhətdən səmərəli və genderə həssas həllər yaradır", - bankın hesabatında qeyd olunur.

Layihə 4 əsas istiqaməti əhatə edir. Diaqnostik araşdırma çərçivəsində sosial müdafiə sistemlərinin mövcud vəziyyətinin qiymətləndirilməsi, əngəllərin, o cümlədən gender maneələrinin aşkarlanması və özəl sektorun iştirakı üçün imkanların müəyyən edilməsi nəzərdə tutulur. Modernləşdirmə strategiyası sosial müdafiə sistemləri və xidmətlərinin təkmilləşdirilməsinə özəl sektorun cəlb edilməsi planının hazırlanmasını, eləcə də dövlət və özəl strukturların məqsədlərinin razılaşdırılmasını nəzərdə tutur. Üçüncü istiqamət ilkin texniki-iqtisadi əsaslandırmalar da daxil olmaqla özəl sektorun iştirakı ilə pilot layihələrin siyahısının hazırlanmasını əhatə edir. Dördüncü istiqamət çərçivəsində isə regional seminar keçiriləcək və beləliklə, region ölkələri arasında təcrübə mübadiləsinin aparılması və nəticələrin yayılması üçün virtual platforma təşkil ediləcək.

ADB qeyd edir ki, texniki yardım sosial müdafiə sistemlərini təkmilləşdirməyə, gender bərabərsizliyini azaltmağa, həssas qruplar üçün xidmətlərin əlçatanlığını artırmağa və gələcək çağırışlara səmərəli cavab verə bilən dayanıqlı mexanizmlər yaratmağa imkan verəcək. Sosial xidmətlərin idarə edilməsində yüksək texnologiyaların tətbiqinə, innovativ maliyyə mexanizmlərindən istifadəyə və dövlət-özəl tərəfdaşlığı modellərinin inkişafına xüsusi diqqət yetiriləcək.