Azərbaycan Respublikasının Xarici İşlər Naziri
Cənab Ceyhun Bayramova

Hörmətli Cənab Nazir Ceyhun Bayramov,

12 ay öncə İranın Qum şəhərinin Ailə Məhkəməsində, hakim Nəmətullah Əli Kəsirinin sədrliyi ilə keçirilən məhkəmə iclasında oğlum Ağayev Ağa İbrahim Rza Azər oğlunun tam şəkildə atasının himayəsinə verilməsi haqqında qərar qəbul edilib. Lakin təəssüf ki, bu qərar hələ də icra olunmamış qalır.

Bu məsələ ilə bağlı dəfələrlə Xarici İşlər Nazirliyinə, Ədliyyə Nazirliyinə, İranın Bakıdakı Səfirliyinə, Azərbaycanın Təbrizdəki Baş Konsulluğuna və Azərbaycanın Tehrandakı Səfirliyinə rəsmi müraciət etsəm də, problem hələ də həllini tapmayıb.

Mən bir ata kimi övladlarımı görmək, onlarla birlikdə olmaq istəyirəm. 5 il 5 ay 1700 gündür ki, övladlarımın üzünə həsrət qalmışam. İran məqsədli şəkildə uşaqlarımı mənə qaytarmır və 4 azərbaycanlı uşağın həyatı orada qaranlıq içindədir.

Cənab Nazir!

2023-cü ildə övladlarımı geri qaytarmaq məqsədilə İrana səfər etdim və 90 gün mübarizə apardım. Lakin İranın Sepah və Ettelaat təşkilatlarının rəsmi nümayəndələri açıq şəkildə bildiriblər ki, uşaqlar Azərbaycana verilməyəcək və əgər bu məsələnin üstünə getsəm, həbs olunacağam. Nəticədə 25 gün həbsdə qaldım, 16 gün qaranlıq otaqda saxlandım, şəkər xəstəsi olduğum halda dərmanlarımı vermədilər və ağır işgəncələrə məruz qaldım.

Yalnız öncədən məsələni ictimailəşdirdiyimə və Sizin, həmçinin Ombudsman Səbinə xanımın böyük dəstəyinə görə məni uzun müddət həbsdə saxlamadılar. Həm də İran dövləti qarşısında heç bir günahım olmadığı üçün azad edildim.

Cənab Nazir!

Uşaqların anası Xalidə Mehbalıyeva, özündən yaşca xeyli kiçik və ailəli olan Cəfər Babayev adlı şəxsə qoşularaq İrana qaçıb və İranın xüsusi xidmət orqanlarının əməkdaşlığına cəlb edilib.

Sizdən xahiş edirəm ki, 4 azərbaycanlı uşağın İrandan geri qaytarılmasına köməklik göstərəsiniz. Xüsusilə, İranın Qum şəhərinin Ailə Məhkəməsinin hakim Nəmtullah Əli Kəsirinin sədrliyi ilə keçirilən məhkəmə iclasında qəbul olunmuş qərarın icrasına nail olmaq üçün İranın Xarici İşlər Nazirliyinə, Ədliyyə Nazirliyinə və İranın Azərbaycandakı Səfirliyinə rəsmi müraciət etməyinizi xahiş edirəm.

Öncədən dərin təşəkkürümü bildirirəm.

Hörmətlə,
Azər Ağa oğlu Ağayev
Azərbaycan Respublikasının vətəndaşı