Kütləvi informasiya vasitələrinə

Son dövrlərdə Azərbaycan Muay Tay-Tayboks Federasiyasına qarşı həyata keçirilən ilhaq cəhdləri, indi isə mənə qarşı təşkil olunmuş qarayaxma kampaniyası ilə davam etməkdədir. Bu iddiaların sübutu kimi 16.12.2024-cü il tarixli Qərarı nümunə göstərə bilərəm.

Sözügedən qərarda qeyd edilib ki, "Kikboksinq Federasiyasının müraciəti nəzərə alınaraq, muay tay idman növü və fənlərinin kikboksinqin fəaliyyət istiqamətinə əlavə edilməsi ilə yayılan idman növləri kimi tanınsın." (Qərar əlavə edilir).

Lakin bu qərardan subyektiv maraqlar üçün istifadə edən Kikboksinq Federasiyasının fəxri prezidenti Adil Əliyev (əslində federasiyanın faktiki sahibi), Ədliyyə Nazirliyində rəsmi qeydiyyatdan keçmiş və ayrıca hüquqi şəxs olan Azərbaycan Muay Tay-Tayboks Federasiyasını ilhaq etmək niyyətindədir. Bunun üçün müxtəlif qanunsuz addımlar atılmaqdadır (federasiyaya dair rəsmi reyestr sənədi əlavə edilir).

Məhkəmə Prosesi və Rəsmi Şikayətlər

Bu məsələyə qarşı mübarizə çərçivəsində:

Federasiya daxilində Adil Əliyevin maraqlarına xidmət edən şəxslər müəyyən edilərək Yasamal Rayon Məhkəməsinə verilib.

Onların mənimsəmə faktları barədə inzibati orqanlara məlumat ötürülüb.

Sözügedən qərar Bakı İnzibati Məhkəməsində mübahisələndirilir.


Hər iki məhkəmə prosesi açıq keçirildiyindən, medianın bu məsələləri işıqlandırması üçün bütün jurnalistləri məhkəmə iclaslarına dəvət edirəm.

Qarayaxma kampaniyası və reallıq

Son günlər bəzi media orqanlarında Kikboksinq Federasiyası adından yayılan yazılar göstərir ki, əsas məqsəd məni federasiya ilə qarşı-qarşıya qoymaq və diqqəti əsas məsələdən yayındırmaqdır. Halbuki mən uzun illər Kikboksinq Federasiyasının sıralarında olmuş, böyük nailiyyətlər qazanmış və onun inkişafına töhfə vermişəm.

Mənim idman nailiyyətlərim şübhə altına alınırsa, o zaman Adil Əliyevin özü tərəfindən Dövlət orqanlarına göndərilmiş rəsmi təqdimatlar da saxta hesab edilməlidir. Halbuki bu təqdimatlar əsasında mənə Əməkdar İdman Ustası adı verilmiş, Prezident tərəfindən mənzil və fəxri fərmanlar təqdim olunmuşdur.

Şəxsi müzakirələr və faktlar

Adil Əliyev, mənim iştirak etdiyim və daha 5 nəfərin şahid olduğu görüşdə "Muay Tay mənimdir", "Bu federasiya mənə məxsusdur" kimi ifadələr işlətmişdir. Bu sözlərin 18 dəqiqəlik audio yazısı məndə mövcuddur. Hazırda bəzi şəxslərə hörmət əlaməti olaraq, bu sübutu açıqlamıram. Lakin ehtiyac yaranarsa, bu faktları da ictimaiyyətin diqqətinə təqdim edəcəyəm.

Sonda bildirirəm ki, mən Kikboksinq Federasiyasını düşmən deyil, dost hesab edirəm və bəzi şəxslər bu iki federasiyanı qarşı-qarşıya qoymaq niyyətindən əl çəkməlidirlər.

Hörmətlə,
Azərbaycan Muay Tay-Tayboks Federasiyasının Prezidenti
9 qat Dünya və Avropa Çempionu, Dövlət Mükafatçısı
Araz Müsayev
18.03.2025