Ağdaş İcra Hakimiyyəti ötən gün keçirdiyi tenderin nəticəsini açıqlayıb.

Nətəcəyə görə, İcra Hakimiyyəti Ağdaş şəhər İqbal Rzayev, F.Səfərov, Ərəş, Mirzalı Əliyev, M.Ə.Rəsulzadə və Sönməz Məmmədov küçələrində təmir işləri aparacaq.
Açıq mənbələrdə qeyd edilir ki, tenderin qalibi ATF MMC olub. Bununla bağlı şirkətlə İcra Hakimiyyəti arasında 397 min 547 manatlıq müqavilə imzalanıb.
Tribunainfo.az AFT MMC ilə bağlı açıq mənbələr üzərindən apardığı araşdırmalarda maraqlı məqamlara rastlayıb. Belə ki, bu şirkət 2010-cu ildən 2020-ci ilə qədər onlarla tenderin qalibi olub. Bu tenderlərdən qazandıqları isə 75 milyon manat təşkil edib. Təkcə, 2024-cü ildə udduiğu tenderlərin sayı isə 9 olub. Həmin tenderlər üzrə MMC 6 milyon 783 min 838 manat əldə edib.
Məsələnin maraqlı tərəflərindən biri odur ki, şirkət ancaq Ağsu aşırımından o yandakı rayonların tenderlərinin qalibi olub. Yəni, hər nə hikmətdirsə, Balakəndən Ağsuya qədər İcra Hakimiyyətlərinin sifarişlərini yerinə yetirib. Hətta oradan Kürdəmir və ya Ucara belə enməyib.
Ötən il şirkətin ən bahalı tenderi Mingəçevirdə qeydə alınıb. Bu şəhərin İcra Hakimiyyətinə bağlı MKTİB 2024-cü il üçün yolların və səkilərin əsaslı təmir işlərininə görə AFT-yə 2 milyon 161 min 11 manat ödəyib.
İsmayıllı rayon İcra Hakimiyyəti də AFT ilə bir il içində iki dəfə anlaşıb. Tribunainfo.az xəbər verir ki, İcra Hakimiyyəti rayonun İvanovka kəndinin yollarını əsaslı təmir etmək üçün ATF ilə 91 min 511 manatlıq, rayon mərkəzinin yollarının təmiri üçün isə 931 min 724 manatlıq satınalma müqaviləsi bağlayıb.
Sözügedən şirkət Qəbələdə isə Heydər Əliyev prospektini bir ildə iki dəfə təmir edib. Belə ki, Qəbələ İcra Hakimiyyəti bunun üçün MMC-yə 852 min 943 manat pul ödəyib.
Elə Göyçay İcra Hakimiyyətinin şəhərin küçə və dalanlarında asfalt örtüyünün əsaslı təmir işlərinin satınalınması prosesindən də şirkət az qazanmayıb. Məlum olan odur ki, AFT bununla əlaqədar İcra Hakimiyyətindən 1 milyon 63 min 558 manat pul qazanıb.
İndi isə AFT-nin kimə məxsus olması məsələsini araşdırmağa çalışaq. Qeyd edək ki, şirkətin rəsmi saytında 2018-ci ildə yaradıldığı qeyd edilir. Açıq mənbələrdə onun sahiblərinin sayının 3 olduğu və qardaş olduqları bildirilir. Tribunainfo.az xəbər verir ki, bu şirkəti Azad, Təbriz və Faxrəddin Muradov qardaşları yaradıblar. Şirkətin adı da onların adlarının baş hərflərinin birləşməsindən ibarətdir.
Bildirək ki, açıq mənbələrdə şirkətin Azərbaycan Avtomobil Yolları Dövlət Agentliyinin sədri Saleh Məmmədova bu və ya digər formada məxsus olmasına dair məlumatlar var. Belə ki, AAYDA bahalı layihələrin icrasını adətən özü həyata keçirir. Amma “ATF” MMC onun istisnalar siyahısındadır.
Elə bu səbəbdəndir ki, AFT MMC konkret bölgədəki asfaltlama işlərini təkbaşına həyata keçirir. Halbuki AAYDA keçirdiyi tenderlərdə podratçı şirkətlərin adını qeyd etmir.
Maraqlı detallardan biri də budur ki, bir qədər əvvəl şirkət Göyçayda qəribə hadisə baş verib. Rayondakı 17 saylı Yol İstismar İdarəsinin müdiri Rəşad Kərimovu işdən çıxarılıb və onun yerinə “ATF” MMC-nin təsisçilərindən olan Təbriz Muradovun oğlu Tehranı müdir təyin edilib.
Bundan sonra dövlətin idarəsi olan 17 saylı Yol İstismarı İdarəsinin bütün texnikaları qanunsuz olaraq “ATF” MMC-nin tenderdə “udduğu” yol tikintisi işlərinə cəlb edilib.
Bundan başqa, açıq mənbələrdə qeyd edilir ki, “ATF” MMC-nin təsisçisi və faktiki rəhbəri Fəxrəddin Muradov Cinayət Məcəlləsinin müxtəlif maddələri ilə təqsirləndirilərək məhkəmə qərarı ilə həbs olunub. Rəhbərlikdə isə onu qardaşları Azad və Təbriz Muradovlar əvəzləyib. Buna baxmayaraq, Saleh Məmmədovun agentliyi şirkətlə “işləməyə”, “ATF” də qurumun tenderlərinin rəqibsiz qalibi olmaqda davam edir.
Yazıda adı keçən qurum və şəxslərin də mövqeyini dərc etməyə hazırıq.
Tribunainfo.az
Fərda Uğur