Dekabrın 30-da Mingəçevir şəhər İcra Hakimiyyətinin başçısı İlham İsmayılov şəhid Rzayev Əli Nəsib oğlunun anası Kamilə Rzayevaya M.Rəsulzadə küçəsində yerləşən 6/102 saylı binanın 1 nömrəli mənzilinin açarını təqdim edib. Rəsmi təqdimat mərasimi ictimaiyyətə sosial dəstək və qayğı nümunəsi kimi təqdim olunsa da, mərasim zamanı baş verən bir məqam cəmiyyətdə ciddi narazılıq və müzakirələrə səbəb olub.

Belə ki, şəhid ailəsinin mənzilinə daxil olan icra başçısı evə ayaqqabısını çıxarmadan daxil olub. Bu hal sadəcə məişət qaydalarının pozulması deyil, həm də şəhid ailəsinə, xüsusilə də şəhid anasına qarşı açıq hörmətsizlik kimi dəyərləndirilir. Azərbaycan cəmiyyətində evə ayaqqabı ilə daxil olmamaq təkcə adət deyil, hörmət və ehtiramın ifadəsidir.

Şəhid anasının evi müqəddəs bir ocaqdır. O evdə həm kədər, həm qürur, həm də Vətən üçün verilmiş canın izi var. Belə bir məkanda göstərilən hər bir davranış ölçülü-biçili, etik və mənəvi dəyərlərə uyğun olmalıdır. Dövlət məmurunun bu cür məsuliyyətsiz davranışı isə onun tutduğu vəzifənin ağırlığı ilə tam ziddiyyət təşkil edir.

Məsələ mənzil açarının təqdim olunması ilə bitmir. Əsas məsələ şəhid ailəsinə münasibətin necə formalaşmasıdır. Kameralar önündə verilən açar real hörmətlə, səmimi davranışla və ən xırda detallara diqqətlə tamamlanmadıqda, bu addım formal xarakter daşıyır.

Bu hadisə bir daha göstərdi ki, vəzifə sahibi olmaq hər zaman yüksək mədəniyyət və mənəvi səviyyə demək deyil. Şəhidlər bu xalqın ən ali dəyəridir, onların ailələri isə xüsusi ehtiramla qorunmalı olan ünvanlardır. Bu həssaslıq göstərilmədikdə, cəmiyyətin haqlı etirazı qaçılmaz olur.

Ortaya çıxan əsas sual isə budur:Şəhid ailəsinə hörmət yalnız rəsmi mərasimlərləmi ölçülür, yoxsa bu hörmət davranışda, münasibətdə və mənəvi dəyərlərə sadiqlikdə özünü göstərməlidir?

Mingəçevir İcra Hakimiyyətinin rəsmi açıqlamasında deyilir ki, Mingəçevir Şəhər İcra Hakimiyyətinin sayt və facebook sosial şəbəkəsində "Şəhid anasına yeni mənzilin açarı verildi" başlığı altında paylaşım bir qrup şəxslər tərəfindən məqsədli şəkildə məsələ əsl məğzindən çıxarılmağa çalışılır. Əsas məqsəd və fikir şəhid ailəsinə diqqət və qayğıdır. Başçının içəri ayaqqabılı keçməsi şəhid anasının təkidi ilə olmuş və digər şəkillərdədə özünün də ayaqqabıda olduğu görünür. Şəhid anası insanlarda düz fikrin formalaşması üçün yerli jurnalistlərə video açıqlama da vermişdir. Bu kimi şeylərdə əsas məqsəd Şəhid anasının yaşayış şəraitinin yaxşılaşdırılması üçün ölkə başçısının tapşırıqlarına əməl olunmasına diqqətin çəkilməsi daha yaxşı və təqdirəlayiq olardı, nəinki neqativ fikirlərin oyadılması. Ajiotaj yaratmaq məqsədi daşıyan neqativ paylaşım olunmazdan qabaq qarşı tərəfin də fikri alınmış olsa idi bu tip anlaşılmamazlıq baş verməzdi.
Əlavə olaraq xatırladırıq ki, “Media haqqında” Azərbaycan Respublikası Qanununun qeyd olunan maddələrinə əsasən 14.1.7. şərəf və ləyaqətin alçaldılmasına, işgüzar nüfuzun ləkələnməsinə, 14.1.9. böhtana, təhqirə və nifrət çıxışlarına, 14.1.11. faktlar və hadisələr qərəzsiz və obyektiv təqdim olunmalı, birtərəfliliyə, 14.1.11-1. saxta məlumatların dərc edilməsinə (yayımlanmasına) yol verilməməlidir.


İcra hakimiyyəti rəsmi mövqe bildirib. Həmin mövqeyni olduğu kimi sizlərə təqdim edirik.