"Bakı Dövlət Universitetində guya müəllim işləyən deputat və yüksək vəzifəli şəxslərin işdən çıxarılmasını dəstəkləyirəm”.

Bu barədə bakunews.az-ya qaynarinfo-ya istinadən keçmiş deputat və icra başçısı, hakim Yeni Azərbaycan Partiyasının (YAP) qurucu üzvlərindən olan Musa Musayev bildirib.

O, əlavə edib ki, hələ 2019-cu ildə bu məsələyə diqqət çəkib. "İslahatlar dalğası yeni başlayanda, 2019-cu ildə mən bu barədə çağırış etmişdim. Demişdim ki, bir sıra yüksək səlahiyyətli məmurlar ayrı-ayrı təhsil ocaqlarında özlərinə kafedralar açdırıblar. Bunu həll olunmalı vacib məsələlərdən biri kimi qeyd etmişdim. Nəhayət, prosesə start verilib”, - deyə Musa Musayev bildirib.

Keçmiş deputatın sözlərinə görə, proses digər ali təhsil ocaqlarında da aparılmamalıdır. "Təkcə Bakı Dövlət Universiteti deyil, digər ali təhsil ocaqlarında da oxşar hallar var. Gedib hərəsi bir kafedra açdırıb. Hamıya da məlumdur ki, onlar həmin kafedraların qapısını belə tanımırlar, auditoriyalara ayaq basmırlar. Yaxşı bəs onda həmin kafedraları "işğal altında” saxlamaq nəyə xidmət edir? Belə bir şəraitdə təhsildə hansı islahatları aparmaq olar?! Ona görə də hesab edirəm ki, bu məsələyə ciddi önəm verilməli, ali təhsil ocaqlarında adı müəllim kimi gedən vəzifəli şəxslər orada uzaqlaşdırılmalıdır. Təhsilimizi, elmimizi məmur şıltaqlığından xilas etməyin və qorumağın vaxtı çatıb”, - deyə Musa Musayev vurğulayıb.

bakunews.az