Bakının Xətai rayonu, “Yeni Həyat” kompleksində yaşayan sakin binanın liftinin düymələrini qoparıb.

Verilən məlumata görə, həmin sakin Binəqədi Rayon Məhkəməsinin hakimi Zamiq Bağırovdur. Hadisə sosial şəbəkələrdə birmənalı qarşılanmayıb.

Bağırovun yaxınları tərəfindən verilən məlumata görə, onun yaşadığı evdə komendantın qərarı ilə liftin fəaliyyəti dayandırılıb. Buna səbəb kimi bəzi sakinlərin təyin olunmuş kommunal ödənişləri etməməsi qeyd edilib. Buna etiraz olaraq, kommunal ödənişləri edən sakinlər Xətai Rayon Məhkəməsinə müraciət ediblər.

Məhkəmə liftin fəaliyyətinin kommunal borca görə dayandırılmaması ilə bağlı qətnamə çıxarıb. Bundan sonra Bağırov, eləcə də digər sakinlər məhkəmə sənədini komendantlığa təqdim etsələr də, liftin fəaliyyəti bərpa edilməyib. Hakim əsəbi şəkildə liftə daxil olaraq idarəetmə panelinə ziyan vurub.

Həmçinin həmin binaya girişlə bağlı qanunsuz müdaxilələrə görə, başqa şikayətlər də var. Hazırda həmin şikayətlər üzrə də məhkəmə çəkişmələri davam edir.