Yaponiyanın zəlzələdən zərər çəkmiş Vacima qəsəbəsində Türkiyədən olan Aydın Muhammet və işçiləri təxliyə edilənlər üçün icma mərkəzinin qarşısında şorba və plov süfrəsi açıblar.

Türkiyə vətəndaşının Yaponiyanın mərkəzində sahibi olduğu tikinti şirkətinin 10 nəfərlik könüllü komandası Yeni il günü şəhərin böyük hissəsini əhatə edən 7,6 bal gücündə zəlzələdən sonra qurbanlara isti yemək verir.

2011-ci ilin martında Yapon arxipelaqının o biri tərəfində baş vermiş güclü zəlzələ və sunami nəticəsində təxminən 20 000 nəfərin ölümünə səbəb olan fəlakət zonalarına yardımdan sonra bu, Muhammetin ikinci təcrübəsidir.

Son 30 ildə həyat yoldaşının vətənində yaşayan Muhammet, dağıntı xəbərini televiziyada görəndən sonra yolların açıldığını bilən kimi hərəkətə keçib: "Mən sadəcə nəsə etməliydim".

5 yük maşınından ibarət komanda nəhayət 11 saat sonra 300 km qarlı məsafəni qət edərək dərhal su və uşaq bezlərindən tutmuş hazır yeməklərə qədər hər şeyi paylamağa başlayıb: "Biz bu qədər yoldan sonra tükənməli idik, amma bura gələn kimi gücləndik".

46 yaşlı Muhammet motivasiyasının insanların heç bir kömək görmədikdə hiss edə biləcəyi ümidsizlik və tənhalığa bələd olmasından qaynaqlandığını deyib: "Mən başqa fəlakət zonalarında olmuşam, ona görə də burada olduğumuz zaman qurbanların xoşbəxtliyini hiss edirəm. Bu, mənə işi davam etdirmək istədiyimi hiss etdirir".

"Həqiqətən minnətdarıq. Ən yaxşısı isti yeməkdir", - deyə 72 yaşlı Matsuo Yata təşəkkür edib.

Muhammet 2011-ci ildə fəlakətə daha az hazır olduğunu, lakin sunamidən zərər çəkmiş şəhərdə bəzi qurbanlara çatmağı bacardığını, həmçinin Naqoyadakı evinin yaxınlığındakı daşqından sonra xilasetmə işlərinə kömək etdiyini xatırlayıb. Onun şirkəti dəqiqədə 400 litr su verə bilən quyu qazıb və böyük enerji generatoru təmin edib. Muhammet hər zaman fermer dostunun yetişdirdiyi düyüdən illik olaraq alır və onun təxminən 1 tonunu təcili ehtiyaclar üçün şirkətində saxlayır.

"10 nəfərdən ibarət komandanın iki gün ərzində edə biləcəyi çox şey var. Orada nəsə edə biləcək daha çox insan olmalıdır. Mən bilirəm ki, yeni ildir, amma dincəlmək vaxtı deyil", - deyə söyləyən Muhammetə yaşlı bir kişi yaxınlaşıb və minnətdarlıq nümayişi olaraq onu bərk qucaqlayıb.(Reuters)