Metodbirləşmə-metodist-müasir metodist-.....

Bu belə də davam edəcək... 18 ildir ölkədə yeni təhsil sisteminə keçid etmişik. ARTİ müəllimlərdə metodiki səriştəlilik formalaşdıra bilmir. Açıq-aydın ortadadır ki, heç bir metodiki səriştəlilik formalaşdıra bilməmişdir. Müəllimləri normal, sadə şəkildə maarifləndirmək əvəzinə yeyinti üçün bir çox yollara əl atması həm müəllimlərdə ikrah hissi yaradır, həm də bu oyun, yersiz rəqabət yeni bir ədalətsizliyin əsasını qoyur.

Metodbirləşmələrin iş fəaliyyətini gördük, sonra onları ləğv edib metodist layihəsi yaratdılar. Metodist layihəsində müəllimləri öyrətdikləri material çox gülünc idi. Materialı alıb əlimizə oxuduqda bir daha gördük ki, təhsil başdan - başa ayrıseçkilik, dayday, pul prinsipi ilə idarə olunur. İndi də müasir metodist layihəsinə keçid ediblər.

Əgər əvvəlki iki plan işə yaramadısa, sadəcə ad dəyişdirməklə üçüncü dəfə eyni şeyi eləmək nə dərəcə düzgündür?

Bir qurum ki, 18 ildir bu qədər peşəkar, ali savadlı, (hətta ARTİ işçilərinin də müəllimləridir onlar) , peşəkar kadra yeni sistemi öyrədə bilmir, indi yenidən tək tək heç bir metodiki təhsili olmayanlara öyrədə biləcək?

Metodikadan təhsil almayan, araşdırma etməyən, əvvəllini, indini, niyəni bilməyənlərə Metodist adı verib məktəbdə ədavət yaratmaq, bu adı vermək nə dərəcə düzgündür?

Təlim tədris hissə müdiri tədris planı işinə baxırsa, müəllimlərin fəaliyyət planını niyə verə bilmir??? Buna görə biz niyə əlavə nələrəsə ehtiyac duyuruq? Birbaşa direktor müavinlərinə təlim keçib onlarda bu səriştəliliyi formalaşdırmaq daha düzgün və ədalətli olmazmı???

Müəllimləri davamlı alçaltmaq, hissləri ilə oynamaq, manipulyasiya etməklə məşğul olan ARTİ, bəs özü metodikanı nə dərəcə bilir? Biz bunu MİQ imtahan izahlarında görmədikmi?

18 ildir səriştə formalaşdıra bilmədiklərində görmədikmi?

İllərdir təlim keçirik deyə yola verəndə və müəllimlər öz pulları ilə kənarda metodika müəllimlərinə qoşulub öyrənəndə görmədikmi?

İllərlə işəqbəbulda "o olmasın, bu olsun, evdəkilər sağ olsun prinsipi ilə yanaşanda" görmədikmi?

Dərsliklər, yaş səviyyəsinə uyğun olmayan sistem, qoşulduğumuz Sinqapur təhsili, davamlı sonuncu yerlər, yersiz layihə, monitorinq və yarışlarda görmədikmi???

Daha nəyi təhlil edirik? Nəyi danışırıq?
ARTİ nə vaxt kitab nəşr etdirdi müəllimlər oxumadı?
ARTİ nə vaxt metodika müəllimləri kimi başdan sona proqramı tədris edən videoçarxlar çıxartdı biz izləməkdik?
ARTİ nə vaxt canlı açıb nəyi başa düşmürsünüz soruşun, öyrənin, bu təhsilimiz üçün vacibdi dedi biz görmədik?
ARTİ nə vaxt vatsap nömrəsi verib nə probleminiz oldu yazın, kömək edin dedi görmədik?

Öyrətmək istəyən ÖYRƏDƏR! Fırlatmaq, dolamaq, ələ salmaq, oyun oynamaq bunlar hamısı Müəllimləri alçaltmaq, yeyinti, mədəni soyğunçuludur. Ən əsası müəllimləri alçaltmaqdır. Bir dəyişiklik edib müəllimləri əllərində dolamaq, onları əllərində oynatmaq, ələ salmaq, ancaq ikrah hissi yaradır.

ARTİ özü direktorlara hər dəfə fərqli məlumat göndərir. Bütün direktorlar da dediyimizi təsdiq edərlər. Direktorlar özləri beziblər. Deyirlər səhər yerindən duran eyni şeyi hər dəfə başqa cür tələb edir. Bəs bu necə idarəetmə, necə sistem, necə yanaşmadır? ARTİ-nin işçilərinin özlərinə əvvəl dərs keçmək lazımdır. Sonra baxarıq, nəsə öyrədə bilərlər ya yox?!

Metodika bütün müəllimlərə lazımdır. Dəyişdirilibsə, heç kimdən asılı olmadan müəllimlərə bu biliklər öyrəndilməli və nə yolla olur olsun bacarığa çevrilməlidir. Yalanlara, oyunlara ehtiyac yoxdur. Birbaşa öyrətməlisiniz. Axı siz təhsil institutusunuz. Necə müəllimlərdən tələb edirsiniz ki, istəsəniz hər uşağa öyrədə bilərsiniz. Deməli, siz də hər müəllimə öyrədə bilərsinuz. Müəllimdən 1 ildə gözlədiyinizi, özünüz 18 ildir etmirsiniz. Təbii bu işdə MDPİM - Metodik Dəstək və Peşəkar İnkişaf Mərkəzi ən böyük günahkardır. Uşağa soska verərmişcəsinə problemləri həll etmək, müəllimləri alçaltmaq, yeni yeyinti sahəsi yaratmaq onların işidir. Əsas odur kimsə öyrənməsin, bizdən asılı olsun, bunu yeyinti yeri yedək, amma guya öyrədirmişik kimi də şərait yaradaq. Kitab işini, test işinu də sataq, şikayət edənlərə hədə-qorxu gələk. Qoy ömür boyu çörəyimiz olsun. Kim neynir müəllimlərin savadlanmasını... Onlara lazımdı, öyrədirmiş kimi görünsünlər və bilmədikləri yerdən həmişə vurub pullarını alsınlar.

Mirzə Ələkbər Sabir demiş:

Millət necə tarac olur olsun, nə işim var?!
Düşmənlərə möhtac olur olsun, nə işim var?!
Qoy mən tox olum özgələri ilə nədir karım,
Dünyavü cahan ac olur olsun nə işim var?!

Tehsilmedia.az