“Qarabağ”ın Çempionlar Liqasının I təsnifat mərhələsindəki rəqibi müəyyənləşib.

Bakunews.az xəbər verir ki, Ağdam təmsilçisi Cəbəllütariqin “Linkoln” klubu ilə üz-üzə gələcək.

Ölkəsinin ən güclüsü hesab edilən “Linkoln” 1976-cı ildə yaradılıb. Komanda 27 dəfə Milli Liqanın qalibi olub və bu göstəricidə rekordçudur. Komanda 19 dəfə ölkə kubokunu, 12 dəfə isə Super Kuboku qazanıb.

“Qırmızı-ağlar” ötən mövsüm Cəbəllütariq çempionatında 20 matçda 52 xal toplayaraq bütün rəqiblərindən güclü olublar. Komanda ən yaxın izləyicisi “Europa”nı 8 xal üstələyib. Ümumiyyətlə, “Linkoln” ölkə çempionatında son üç mövsümün qalibidir.

Komanda ev oyunlarını 2 min azarkeş tutumuna malik “Viktoriya” stadionunda keçirir.

“Linkoln”u ispaniyalı Xavyer Munyos Sançes çalışdırır. Elə heyətdə də onun həmyerliləri çoxdur. Komandanın adıçəkilən Pireney ölkəsindən olan futbolçularının ümumi sayı 8-dir. Daha bir legioner Qanadandır. Heyətin qalan üzvləri yerli oyunçulardır.

“Transfermarkt” portalına görə, “Linkoln”un ümumi dəyəri 1,88 milyon avrodur. Müqayisə üçün qeyd edək ki, “Qarabağ”ın dəyəri 14,45 milyon avroya bərabərdir.

“Linkoln”un ən bahalı oyunçuları qapıçı Deyl Kolinq, müdafiəçi Bernardo Lopes, İtan Brito və hücumçu Xuanfridir. Onların hər biri 150 min avro qiymətləndirilir.

Əvvəllər komandanın bir çox oyunçuları ikinci iş kimi futbol oynayıblarsa, hazırda vəziyyət fərqlidir. Heyətdə yalnız hücumçu Li Kasyaronun digər peşəkar fəaliyyət sahəsi də var. 41 yaşlı forvard gündəlik həyatda polisdir. O, keçən mövsüm 6 matçda forma geyinib.
47 yaşlı rəqib avrokuboklarda müntəzəm çıxış edir. Cəbəllütariqin qitəmiqyaslı yarışlarda ilk təmsilçisi olan (2014-cü il - red.) “qırmızı-ağlar” ümumilikdə 40 görüş keçiriblər. “Linkoln” bu qarşılaşmaların 9-da qələbə qazanıb, 7-də heç-heçə edib, 24-də uduzub. Komanda avrokuboklarda ümumilikdə 39 qol vurub, 73 qol buraxıb.

“Linkoln”un qitə yarışlarında ən uğurlu nəticəsi 2021/22 mövsümündə qeydə alınıb. Konfrans Liqasının qrupuna düşən kollektiv “Kopenhagen” (Danimarka), PAOK (Yunanıstan) və “Slovan” (Bratislava, Slovakiya) ilə mübarizədə sonuncu olub. Cəmi iki qol vuran komanda mübarizəni xalsız başa vurub.

Konkret Çempionlar Liqasına gəlincə, “Linkoln” qitənin bir nömrəli klub turnirində 19 matç keçirib və bunların 6-da qələbə qazanıb. 10 dəfə uduzan komanda 3 görüşdə heç-heçəyə razılaşıb.

Ümumilikdə, nə heyətinə, nə də avrokuboklardakı çıxışına görə “Linkoln”u “Qarabağ”la müqayisə etməyə dəyməz. Əminliklə demək olar ki, avrokuboklarda qrup mərhələlərinin daimi iştirakçısı olan, hətta pley-offlara vəsiqə qazanmağı bacaran Azərbaycan təmsilçisinə püşkdə münasib rəqib düşüb.

Qeyd edək ki, Çempionlar Liqasında I təsnifat mərhələsinin ilk oyunları iyulun 11-12-də, cavab görüşləri isə iyulun 18-19-da keçiriləcək.