Sabiq baş nazir Surət Hüseynovun vəfat etməsi onun keçmiş fəaliyyəti ilə bağlı yeni müzakirələrə səbəb olub.

Belə ki, mediada və sosial şəbəkələrdə sabiq baş nazir haqqında müxtəlif mövqelər ifadə olunur. Həmin mövqelərdə Surət Hüseynov haqqında tənqidlərlə yanaşı, ən sərt ifadələrə də yer ayrılır.

Bu isə sabiq baş nazirin ailə üzvlərinin narahatlığına səbəb olub.

BakuNews.az bildirir ki, Surət Hüseynovun ailəsi Gununsesi.info – ya bu deyilənlərlə bağlı öz fikirlərini təqdim edib.

Sabiq baş nazirin ailəsinin redaksiyamıza göndərdiyi bəyanatı olduğu kimi təqdim edirik:

“Ailəmizə ağır itki baş verib. Acımızı bölüşənlərə, dərdimizə insani yanaşanlara təşəkkür edirik. Allah ölənlərinizə rəhmət eləsin, qalanlara cansağlığı, uzun ömür versin.

Surət Hüseynovun ölüm xəbəri çıxar-çıxmaz, bəzi medialar baxış saylarını artırmaq kimi cılız məqsədlərlə milli adət və ədəbimizi, adi insani tərbiyəni və etik normaları ayaq altına alaraq, ona qarşı qaralama, şadyanlıq və nifrət kampaniyası başladıblar.

Söz və fikir azadlığı insan haqlarına və ləyaqətə xidmət etməlidir. Bu media mənsublarından etik normalara riayyət etməyi və Surət Hüseynova qarşı qaralama kampaniyasına son qoymağı tələb edirik. Əks halda, ünvanına işlədilən hər təhqiramiz ifadəyə görə məhkəməyə müraciət edəcəyik”.

Hörmətlə,

Surət Hüseynovun ailəsi