Son illərdə sakinlərin ən çox narazılıq etdiyi rayonlardan biri, bəlkə də birinicisi Xətai rayyonu olub. Keçmiş icra başçısı Razim Məmmədovun rəhbərliyi dönəmində bu royonun “oğru qanunları” ilə idarə olunduğu çoxlarına bəllidir. Xətainin icra başçısı istefaya göndəriləndən sonra rayon sakinləri düşünürdülər ki, Razim Məmmədovun gedişi ilə rayonda bir sıra özbaşınalıqların qarşısı alınar, ən azı “yaşıl soyqırım”a ara verilər, binaların həyətlərində qanunsuz tikililərə imkan verilməz və s. Amma necə deyərlər, sən saydığını say, gör yeni gələn icra başçısı nə sayırmış…
Razim Məmmədovdan sonra Xətainin icra başçısı vəzifəsinə təyin olunan Quluyev Rafiq Çəpərxan oğlu əslində “yeni kadr” sayıla bilməz. Hətta, çoxlarının düşündüyü kimi, o, islahatçı komandanın üzvü də deyil. Sadəcə, R.Məmmədov vəzifəsindən azad olunduqdan sonra, Prezident Administrasiyasında illərdir onu himayə edən məmurlar Rafiq Quluyevi bu posta təyin etdirməklə, yenidən Xətai rayonunu öz nəzarətləri altında saxladılar.
Bununla bağlı cumhuriyyet.az bildirir ki, Rafiq Quliyev hələ R.Məmmədovun I müavini olarkən oliqarx məmur adını haqq edənlərdən idi. Bir dövlət məmurunun o qədər də böyük olmayan əmək haqqı ilə necə oliqarxa çevrilməsinin sirrini bilənlərdən də biri Rafiq Quliyev olsun gərək. Xatırladaq ki, R.Məmmədovun görəvindən alınmasından qısa müddət əvvəl Rafiq Quliyevlə ciddi münaqişələridə olmuşdu. R.Quliyevin Xətai rayonundakı obyektlərinə şəxsən özü gələn Razim Məmmədovun tapşırığı ilə həmin ticarət müəssisələrinn işıqları bir gündə kəsilmişdi. Etibarlı mənbənin bildirdiyinə görə bu narazılığın səbəbi Rafiq Quliyevin obyektlərinin sayını R.Məmmədovdan gizlətməsi olubmuş. Və ticarət obyektlərinin sayının kifayət qədər çox olduğunu bilən icra başçısının kriz keçirdiyini söyləyən mənbə əlavə olaraq onu da qeyd etmişdi ki, sonda İcra başçısı və I müavin anlaşmaya nail olmuşdular.
Diqqətli oxuculara cumhuriyyet.az olaraq onu da xatırladaq ki, Razim Məmmədovun Xətai rayonuna rəhbərliyi dönəmində səkiyə, qaz borularının üstünə, illərlə əziyyət çəkilərək əkilib becərilən ağacların olduğu əraziyə müxtəlif məqsədli kommersiya obyektlərinin tikintisi üçün çoxlu sayda sərəncamlar verilib. İcra Hakimiyyətinə yaxın mənbənin söylədiyinə görə bu tip məsələlər məhz başçının I müavini Rafiq Quliyevin nəzarətində olub. Yəni həmin Sərəncamlara təşkilatçılığı Rafiq Quliyev edib. Sözsüz ki, I müavin bu tip məsələləri özünə yaxın olan şəxslərin vasitəsi ilə həyata keçirib. Bu gün isə Razim Məmmədov yoxdur. Söz və səlahiyyət sahibi Rafiq Quliyevdir. Xətai rayonunda məhz Rafiq Quliyevin sayəsndə elə bir anormal vəziyyət yaranıb ki, bu şəxsə ölkə başçısının söylədiyi kimi “heç olmazsa Allahdan qorx” deməkdən başqa çarə qalmır.

Rafiq Quliyev rayona icra başçısı təyin olunan kimi ilk növbədə 5-6 avtoyuma məntəqəsi, çay evləri açdı, ağacları qıraraq yerində obyektlər tikdi, yol qırağındakı meşəlikləri məhv etdi.
Hətta sakinlər Rafiq Quliyevin çay evlərində baş verənlər, gecələr olan səs-küylər, içkili qadın səsləri, dava-dalaş barədə haralara yazmadılar. Rayonun Cavanşir küçəsində yerləşən “Qarabağlılar 19” adlı obyektin hüquqi sahibi Rafiq Quliyevin qohumu Afət xanım barədə də çox yazdılar. Amma nəticə olmadı. Rafiq Quliyevin rayondakı qoçusu İntiqam barədə də mediada çox yazılıb. Xətai rayon Mənzil Kommunal Təsərrüfat Birliyinin rəis müavini olan İntiqam Cümşüdov Xətai rayonunda “Oliqarx” ləqəbi ilə tanınır. İntiqam Cümşüdovun Xətai rayon Gəncə prospektində çoxsaylı obyektlərinin olduğu bildirilir. Aylıq əmək haqqısı 1000-1500 manat arasında dəyişən kiçik bir məmurun milyonlarla manat qiyməti olan obyektlərə necə və hansı pullarla sahib olması maraqlıdır. Əldə etdiyimiz digər məlumatda isə bildirilir ki, Xətai rayonunda obyekt, ev və sair tikililərin icra hakimiyyətindən “icazə” alınması məsələlərinə də İntiqam Cümşüdov baxır. Onu da qeyd edək ki, İntiqam Cümşüdov bundan əvvəl Binəqədi rayon İcra Hakimiyyətinin başçısının Biləcəri qəsəbəsi üzrə ərazi icra nümayəndəsi işləyib. İndi İ.Cümşüdovun da R.Quliyev kimi icra başçılığına doğru yürüdüyü bildirilir…

Son vaxtlar Rafiq Quliyev Əhmədli ərazisindəki yaşıllıqları məhv edərək kafe-restoran tikdirir. Bu işdə ona dəstək olanlardan biri də Azərbaycan Respublikası Dövlət Şəhərsalma və Arxitektura Komitəsi Ərazi Tikinti-Planlaşdırma Mərkəzinin İdarə Heyətinin sədri Ramin Abdullayevdir. Ramin Abdullayev hər dəfə icra başçısı Rafiq Quliyevin tikinti ilə bağlı məktublarına “Məqsədə uyğundur “ dərkənarını qoyub, cavabını yazır.