ABŞ-ın Nyu-York şəhərində yerləşən Türk Evində Amerika Azərbaycanlıları Koordinasiya Şurasının (AAKŞ) toplantısı keçirilib
Toplantıda ABŞ-ın 9 ştatından 15 təşkilatın 22 nümayəndəsi, Diasporla İş üzrə Dövlət Komitəsinin, Azərbaycanın ABŞ-dakı səfirliyinin və BMT yanındakı daimi nümayəndəliyinin əməkdaşları iştirak ediblər. Azərbaycan və ABŞ-ın Dövlət himnlərinin səsləndirilməsi ilə başlayan toplantıda müasir Azərbaycan dövlətinin qurucusu Heydər Əliyevin və ölkəmizin ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik
sükutla yad edilib. Toplantı iştirakçılarını salamlayan Diasporla iş üzrə Dövlət Komitəsinin sədr müavini Elşad Əliyev qurumun fəaliyyəti barədə geniş hesabatla çıxış edib.
Komitənin çoxşaxəli fəaliyyət istiqamətləri, Koordinasiya şuralari, Azərbaycan evləri, həftəsonu Azərbaycan məktəbləri və Diaspor Gənclərinin Yay düşərgələri kimi layihələri nəzərə çatdırıb. Sonra xalqımızın böyük Zəfərini əks etdirən videoçarx nümayiş etdirilib. Amerika Azərbaycanlıları Koordinasiya Şurasının “Alliance of Azerbaijani Organizations” adı ilə ABŞ-da rəsmi qeydiyyatdan keçdikdən sonra baş tutan ilk toplantısı fəal müzakirələrlə davam etdirilib. Tədbirdə çıxış edənlər ABŞ-da Azərbaycan diasporunun fəaliyyəti və AAKŞ-nın 2023-cü il ərzində fəaliyyətindən, qarşıdakı plan və perspektivlərdən danışıblar. Daha sonra AAKŞ-a yeni 5 üzv-təşkilat qəbul edilib. Beləliklə, AAKŞ-a üzv-təşkilatların sayı 18-ə çatıb. Toplantının sonunda AAKŞ-ın strukturuna səsvermə yolu ilə seçkilər keçirilib. AAKŞ İdarə Heyətinin, Məşvərət Şurasının üzvləri və prezident seçilib. Qarşıda duran məsələlərin həlli məqsədilə İşçi Qrup da yaradılıb.