Kişinyov şəhərində Azərbaycanın Zəfər Gününə həsr olunmuş bayram tədbiri keçirilib.
Azərbaycanın Moldovadakı səfirliyinin “Qələbə” bağçasında təşkil olunmuş tədbirdə Azərbaycan diasporunun 100 nəfərə yaxın nümayəndəsi, diplomatik
korpusun əməkdaşları, Moldovanın rəsmi şəxsləri və müxtəlif icmaların təmsilçiləri iştirak ediblər. Öncə müasir Azərbaycan dövlətinin qurucusu Heydər Əliyevin səfirlik ərazisindəki büstü ziyarət edilib. Tədbir iştirakçıları görkəmli dövlət xadiminin abidəsinin önünə gül dəstələri düzüb, ümummilli liderin və ölkəmizin ərazi bütövlüyü uğrunda canlarından keçmiş şəhidlərimizin əziz xatirəsini bir dəqiqəlik sükutla yad ediblər. Tədbirdə Azərbaycanın Moldovadakı səfiri Qüdsi Osmanov, Moldova parlamentinin vitse-spikeri Mixay Popşoy, Türkiyənin Moldovadakı səfiri Uyqar Mustafa Sertel, Moldova Azərbaycanlıları Konqresinin sədri Elçin Bayramov, Moldovanın Millətlərarası Münasibətlər Agentliyinin sədri Nikolay Reditse və başqaları çıxış ediblər. Onlar Azərbaycan tarixinə qızıl hərflərlə yazılan Zəfər Günü və Azərbaycanın ərazi bütövlüyünün tam bərqərar olunması münasibətilə xalqımızı və soydaşlarımızı təbrik ediblər. Xankəndidə keçirilən hərbi parad tarixi ədalətin bərpası və beynəlxalq hüququn təntənəsi adlandırılıb. Moldovanın hər zaman ölkəmizin ərazi bütövlüyünü, suverenliyini dəstəklədiyi və bunun qarşlıqlı olduğu diqqətə çatdırılıb. Moldova xalqının tərkib hissəsi olan Azərbaycan diasporunun fəaliyyəti yüksək qiymətləndirilib. Tədbir çərçivəsində “Qələbə” bağçasında XVIII əsrin məşhur Azərbaycan şairi, Qarabağ xanının vəziri Molla Pənah Vaqifin barelyefi açılıb və Zəfər Gününə həsr olunmuş fotosərgi nümayiş etdirilib. Tədbir xatirə fotosunun çəkilməsi ilə yekunlaşıb.