"Bakunews.az" Suraxanı rayonu, Qaraçuxur qəsəbəsi, Əhməd Mehbalıyev küçəsində yerləşən "Neftçilər parkı"-ında kəsilib yerə tökülmüş ağacların görüntüsünü əldə edib. Görüntüləri əldə etdiyimiz mənbə parkda belə halların ilk dəfə baş vermədiyini bildirir. Onun sözlərinə görə, park tikilərkən mindən çox yararlı ağac kəsilib. Park istifadə verildikdən bu günə qədər də dəfələrlə ağac kəsimləri olub. "Kəsilən ağacların sayı o qədər çoxdur ki, kötüklərinin süni salınmış otların içində "göz çıxardır"- mənbəmiz bildirib.

Azərbaycan Respublikasının prezidenti İlham Əliyev ətraf mühitin qorunması məqsədilə 25 dekabr 2023-cü ildə ölkəmizdə 2024-cü ilin “Yaşıl dünya naminə həmrəylik ili” elan etməsiylə bağlı sərəncam imzalayıb. Qarşılaşılan hadisələr, sakinlərin çəkdikləri foto və videolar isə sərəncamın yerinə yetirilmədiyini bildirir. Sözügedən məsələ ilə bağlı Suraxanı Rayonu İcra Hakimiyyətinin "Yerli özünü idarəetmə orqanlarıyla iş şöbəsi"-nin rəisi Xanoğlan Allahverdiyevlə danışmaq istəsək də, bu, baş tutmadı. Zənglərimizə cavab verməyən Xanoğlan Allahverdiyevin məsləhətçi əməkdaşlarından biri kimi özünü təqdim edən Toğrul Səmədov belə bir məsələdən xəbərsiz olduğunu, şöbə rəisinin isə hazırda işdə olmadığını bildirərək, onunla nə vaxt əlaqə saxlayacağımız barədə də dəqiq məlumatını olmadığını dedi. Əməkdaşımız Toğrul Səmədovla danışıqdan sonra qısa müddət ərzində ona göndərilən görüntülərin olduğu yerə gedib. Foto və videolarda ağac kəsintilərin olduğu yeri təmizlənmiş görüb.

İmamət İSMAYIL ƏDİL BƏYLİ