Azərbaycan Milli Məclisinin deputatı Könül Nurullayeva Nizami Rayon İcra Hakimiyyətinin təşkilatçılığı ilə keçirilən iftar süfrəsində iştirak edib. Bu barədə deputat öz sosial şəbəkə hesabında paylaşım edib.

O, paylaşımında müqəddəs Ramazan ayının mənəvi dəyərlərimizi daha da gücləndirdiyini vurğulayaraq, tədbirin yüksək təşkil olunduğunu qeyd edib. Könül Nurullayeva iftar süfrəsində şəhid ailələrinin üzvləri, qazilər və Vətən müharibəsi iştirakçıları ilə bir araya gəldiyini bildirərək, onlara dərin hörmət və minnətdarlığını ifadə edib.

Deputat fürsətdən istifadə edərək, bütün Nizami rayon ictimaiyyətini qarşıdan gələn Ramazan bayramı münasibətilə təbrik edib və duaların qəbul olunmasını diləyib:

"Bir daha fürsətdən istifadə edərək, başda şəhid ailələrinin üzvləri, qazilərimiz və Vətən müharibəsi iştirakçıları olmaqla bütün Nizami rayon ictimaiyyətini qarşıdan gələn Ramazan bayramı münasibətilə ürəkdən təbrik edirəm! Allah bütün dualarınızı qəbul etsin!"

Tədbir çərçivəsində Ramazan ayının önəmi, birlik və həmrəylik dəyərləri vurğulanıb. İftar süfrəsində iştirak edən şəhid ailələri və qazilər onlara göstərilən diqqət və qayğıya görə minnətdarlıqlarını bildiriblər.

Qeyd edək ki, Ramazan ayı insanlar arasında həmrəyliyi, xeyirxahlığı və paylaşmağı təşviq edən müqəddəs aylardan biridir. Bu kimi tədbirlər cəmiyyətin müxtəlif təbəqələrinin bir araya gəlməsinə və mənəvi bağların güclənməsinə töhfə verir.