Azərbaycanın ədalət sisteminə olan inam, Binəqədi rayonu İcra Şöbəsində baş verən iddialarla bir daha sınağa çəkilir. Türkiyə vətəndaşı, 2016-cı ildə tanış vasitəsilə etibar etdiyi, Bakı şəhəri Binəqədi rayonunda yaşayan İran vətəndaşı Əkbər Qurbaniyə (Akbar Ghorbani) 60.000 ABŞ dolları bank krediti və əlavə olaraq 5.000 ABŞ dolları nağd pul verib. Məqsəd – kredit təşkil etmək idi. Ancaq nəticə – illərlə davam edən susqunluq, aldadılma və ədalətsizlik.

Zərərçəkmiş vətəndaşın dediyinə görə, pulu alan Əkbər Qurbani və həyat yoldaşı bir müddət sonra ortadan qeyb olub, bütün əlaqə vasitələrindən onu bloklayıb və illərlə xəbərsiz şəkildə yaşamlarına davam ediblər. Şikayətçi, bu müddət ərzində bütün dövlət orqanlarına müraciət etsə də, heç bir nəticə əldə edə bilməyib.

2023-cü ildə Tezatlar qəzetinin rəhbərliyinin dəstəyi ilə vəkil Məmmədov Araz Məil oğlu ilə müqavilə bağlanır və məsələ hüquqi müstəviyə çıxarılır. Nəticədə 2024-cü ilin aprel ayında Bineqədi Rayon Məhkəməsi Əkbər Qurbaniyə qarşı borcun ödənilməsi ilə bağlı qərar çıxarır. Qərar hüquqi qüvvəyə minərək icra üçün Binəqədi İcra Şöbəsinə göndərilir.

Ən dramatik hissə isə bundan sonra başlayır. Şikayətçinin bildirdiyinə görə, Bineqədi İcra Şöbəsinin əməkdaşları borcun alınaraq geri ödənməsi üçün icra prosesini ya ləngidir, ya da ondan rüşvət tələb edirlər. İddialara əsasən, əməkdaşlar açıq şəkildə bildiriblər ki, “pulun yarısını bizə verməsən, bu pulu ala bilməzsən”. Bu kimi ifadələr təkcə qanunsuz deyil, həm də vətəndaşın ədalətə olan son ümüdünü məhv edir.

Şikayətçi bildirir ki, sanki dövlət orqanlarının bir qismi öz funksiyalarını yerinə yetirməklə deyil, vətəndaşları bezdirib onların haqlarından vaz keçməsini təmin etməklə məşğuldur. Bu hal, yalnız bir şəxsin problemi deyil – hüququn susduğu, rüşvətin danışdığı yerlərdə cəmiyyətin bütün təbəqələri zərər görür.

Zərərçəkmiş şəxs BakuNews.az vasitəsilə Azərbaycan ictimaiyyətinə və dövlət qurumlarına səslənir:
“Yalvarıram, bu məsələni ictimailəşdirin. Mənim kimi yüzlərlə insan susur, qorxur və öz haqqını ala bilmir. Bineqədi İcra Şöbəsindəki bu rüsvayçı sistemə son qoyulmalı, Əkbər Qurbanidən məhkəmə qərarına əsasən borcum alınmalı və ədalət bərpa olunmalıdır.”

Bu hadisə bir daha göstərir ki, ədalətin reallaşması yalnız qərarın çıxarılması ilə bitmir. Əsas mərhələ – onun yerinə yetirilməsi və hüququn hamı üçün eyni işləməsidir. Dövlət orqanlarından tələb olunan: rüşvəti deyil, qanunu əsas tutmaqdır.