Bakunews.az xəbər verir ki, tanınmış şair-jurnalist Elşad Barat sosial şəbəkə hesabında Binəqədi Rayon İcra Hakimiyyəti və xüsusilə Binəqədi qəsəbəsi üzrə icra nümayəndəsi Qadir Məmmədov haqqında sərt tənqidi çıxışla yadda qalıb. Jurnalist bildirib ki, qəsəbədə apardığı təmir işləri zamanı həyətində işləyən fəhlələr polis vasitəsilə saxlanılıb və bölməyə aparılıb.

Elşad Barat baş verənləri qərəzli və qanunsuz hesab edərək, məsuliyyəti birbaşa rayonun icra başçısı Elxan Allahverdiyev və nümayəndəsi Qadir Məmmədovun üzərinə qoyur. O, paylaşımında qeyd edir:

“20 ilə yaxındır ki, mətbuatdayam, amma bu qədər haqsız münasibəti ilk dəfə görürəm. Mənim həyətimdə bir otaq artırmağım dərd olubsa, Binəqədidə hər gün baş verən qanunsuz tikililərə niyə göz yumulur? Kimlərdən nə alınıb, kimlərə nə verilib?”

Jurnalist əlavə edib ki, bu hadisədən sonra rayon ərazisində baş verən bütün qanunsuz tikinti, rüşvət və vəzifədən sui-istifadə hallarını ictimailəşdirəcək:

“İndi işimi-gücümü buraxıb, Binəqədidə baş verən qanunsuzluqları araşdıracağam. 4 il əvvəl Şamaxıdan bavulla gələn nümayəndənin bu gün hansı var-dövlətə sahib olduğu ictimaiyyətin maraq dairəsində olacaq.”

Əgər səsləndirilən fikirlər təsdiqini taparsa, bu, həm də Prezident İlham Əliyevin dövlət məmurlarına verdiyi “xalqın xidmətində olun” tapşırığına açıq şəkildə zidd davranış kimi qiymətləndirilə bilər.

Bakunews.az qarşı tərəfin – Binəqədi RİH və Qadir Məmmədovun mövqeyini işıqlandırmağa hazırdır.