Bakunews.az xəbər verir ki, 1954-cü il təvəllüdlü Rzayeva Sevil Alik qızı yaşadığı evin sələm yolu ilə əlindən alındığını iddia edərək hüquq-mühafizə orqanlarına və ictimaiyyətə müraciət edib. Sevil xanım bildirir ki, maddi ehtiyac səbəbilə tanımadığı Diana adlı qadına 75 min manatlıq sənədə imza ataraq 65 min manat pul alıb. Lakin bu sövdələşmə nəticəsində həyatının kabusa çevrildiyini deyir.

Onun sözlərinə görə, “sələmçi Diana” saxta imtina ərizəsi hazırlayaraq Sevil xanımın öz evindən və əşyalarından imtina etdiyini sənədləşdirməyə çalışıb. Daha da dəhşətlisi budur ki, Sevil xanım qoca anası və qızı ilə birlikdə zorla evdən çıxarılıb, onlara qarşı təhqiramiz ifadələr işlədilib.

Sevil xanım iddia edir ki, Diana adlı qadının arxasında Kəmalə Bədəlova adlı başqa bir şəxs dayanır və Diana əslində onun vasitəsi ilə bu işləri həyata keçirir. Sələm borcuna görə artıq 28 min manat ödəniş etdiyini bildirən Sevil xanım, 150 min manat dəyərində olan evini 65 min manata sələmə qoyub və nəticədə tamamilə mülkiyyətindən məhrum edilib.
Hazırda Sevil xanım hüquqi yardım axtarır, çünki sələm müqaviləsinin qeyri-qanuni şərtlərlə qurulduğunu və onun aldadıldığını, psixoloji və fiziki zorakılığa məruz qaldığını iddia edir.

Növbəti qurbanlardan biridə 300 min manatlıq mənzili 160 min manat qarşılığında ələ keçirilib...

Bakunews.az xəbər verir ki, növbəti sələmçilik qalmaqalı paytaxt sakini Həşimli Mehman Vahid oğlunun şikayəti ilə gündəmə gəlib. O, 2024-cü ilin sentyabrında Surayə adlı qadın vasitəsilə Diana (Dina), Validə və Kəmalə adlı qadınlarla tanış olduğunu və nəticədə 131.5 kv.m sahəsi olan, 300 min manat dəyərindəki evini sələmə qoymaq məcburiyyətində qaldığını bildirib.

İddialara görə, bu qadınlar birlikdə hərəkət edərək Mehman Həşimlinin evinə cəmi 165 min manat pul təklif ediblər, lakin alqı-satqı zamanı bu məbləğ notarius tərəfindən qəbul edilməyib. Bunun əvəzinə, müqavilədə 180 min manat göstərilməsi razılaşdırılıb. Sənəd üzərində göstərilən rəqəm isə sonradan aldatma və təzyiq alətinə çevrilib.

Şikayətçinin bildirdiyinə görə, bu günə qədər 57 min manat ödəniş etsə də, qarşı tərəf ümumi 270 min manat tələb etməklə ona təzyiq göstərir. Hətta iddia olunur ki, “Süleyman” adlı şəxs özünü icra məmuru kimi təqdim edərək evə basqınlarda iştirak edib.

Həşimli Mehman baş verənləri planlı bir sələm şəbəkəsinin fəaliyyəti kimi qiymətləndirərək, bu şəxslərin ehtiyac içində olan insanların əmlakını ələ keçirmək üçün təzyiq, hədə-qorxu və saxta hüquqi üsullardan istifadə etdiyini deyib. O, hüquq-mühafizə orqanlarını və məhkəmə instansiyalarını bu şəbəkənin fəaliyyətinə hüquqi qiymət verməyə çağırır.

Sələm şəbəkəsinin yeni qurbanı, 63 min manata görə 350 min manatlıq evini itirməklə üz-üzə qalıb

Bakunews.az-a daxil olan məlumatlara əsasən, növbəti sələmçilik hadisəsi Rəhimli Amil Mübariz oğlu ilə bağlıdır. Zərərçəkən bildirir ki, pula ehtiyac duyduğu üçün Rövşən adlı tanışına müraciət edib. Rövşən isə onu Emin, daha sonra isə Diana (Dina) adlı qadınla tanış edib. Məhz bu tanışlıq Amil Rəhimlini sələm bataqlığına sürükləyib.

İddialara görə, Diana 70 min manat sələm verməyə razı olub, lakin 7 min manat faizi əvvəlcədən kəsərək ona yalnız 63 min manat təqdim edib. Müqavilə 50 saylı notariusda bağlanıb, lakin sənədlərdə borc 70 min yox, 140 min manat kimi rəsmiləşdirilib. Üstəlik, bu məbləğ qarşılığında Amil Rəhimli Ağaneymətullah küçəsində yerləşən, 86 kv.m sahəsi olan 350 min manat dəyərindəki mənzilini girov qoyub.

Daha da dramatik olan isə odur ki, notariusdan çıxarkən sənəddə göstərilən artıq 77 min manat Diana tərəfindən geri alınıb. Rəhimli hər ay 2800 manat olmaqla 10 ay ərzində faiz və hissə-hissə ödənişlərini edib. Lakin ödənişlərə baxmayaraq, Diana evin qaytarılmayacağını, hətta zənglərə cavab verilməyəcəyini açıq şəkildə bildirib.

Zərərçəkən məsələ ilə bağlı bütün sənəd və sübutları aidiyyəti hüquq-mühafizə orqanlarına təqdim etdiyini, lakin hələ də nəticə əldə edə bilmədiyini deyir. O, 63 min manat sələm qarşılığında həm mənəvi, həm maddi olaraq çökdürüldüyünü, Diana və onun dəstəsinin məqsədinin yüksək gəlir əldə etməklə insanların əmlakını ələ keçirmək olduğunu qeyd edir.

Bakunews.az olaraq bu məsələni diqqətdə saxlayırıq. Qanunsuz əmlak ələ keçirmə halları ilə bağlı oxucularımızı məlumatlandırmağa davam edəcəyik.