Son günlər sosial mediada və bəzi xəbər portallarında “Dr. Emma” kimi tanınan Emma Həsənzadənin fəaliyyəti ilə bağlı yayılan iddialar ciddi rezonansa səbəb olub. Əsasən lisenziyasız estetik əməliyyatlar keçirməsi və bu əməliyyatlar zamanı ölüm halları ilə adının hallanması ictimaiyyətdə narahatlıq doğurmuşdu. Lakin məsələ ilə bağlı yeni açıqlamalar və faktlar bu iddiaların doğru olmadığını ortaya qoyur.

Mediada yer alan ilkin məlumatlarda Emma Həsənzadənin rəsmi tibbi təhsili və fəaliyyət lisenziyası olmadan estetik əməliyyatlar keçirdiyi, son olaraq “Dəniz” klinikasında çalışdığı və Orxan Nağıyev adlı şəxslə əməkdaşlıq etdiyi bildirilmişdi. Həmçinin onun keçirdiyi əməliyyatlardan birində pasiyentin vəfat etdiyi iddia olunmuşdu.

Lakin məsələni daha dərindən araşdırdıqda məlum olub ki, *baku.news.az* saytında və sosial şəbəkələrdə yayılan məlumatlar qərəzli və yanlış olub. Qarşı tərəflə – həm Emma Həsənzadə, həm də adı hallanan Orxan Nağıyevlə əlaqə saxlanılıb və onların bu əməliyyatlarla heç bir bağlılığının olmadığı aydınlaşdırılıb.
Emma Həsənzadə adından yayılan məlumatların saxta profillər və anonim mənbələr tərəfindən məqsədli şəkildə tirajlandığı ehtimal edilir. Onun və Orxan Nağıyevin estetik əməliyyatlarda iştirak etdiyi, yaxud hansısa tibbi fəsada səbəb olduqları ilə bağlı rəsmi sübut və sənəd təqdim olunmayıb.

Qarşı tərəf yayılan xəbərləri qəti şəkildə təkzib edib və reputasiyalarına qarşı aparılan bu kampaniyanın hüquqi müstəvidə araşdırılması üçün aidiyyəti orqanlara müraciət edəcəklərini bildirib.

ictimaiyyətə təqdim olunan məlumatların bir qisminin yoxlanılmamış və qərəzli olduğu aydın olub. Media nümayəndələri və sosial şəbəkə istifadəçiləri yayılan informasiyalara qarşı daha məsuliyyətli yanaşmalı, qarşı tərəfin mövqeyini öyrənmədən birtərəfli məlumatların yayılmasından çəkinməyə dəvət edirik.