Daxil İşlər Nazirliyinin Polis Akademiyasının əməkdaşları Balakən, Zaqatala və Qax rayonlarında IX-X-XI sinif şagirdləri ilə görüş keçiriblər. Tədbirin keçirilməsində əsas məqsəd yeniyetmə və gənclərimizin təhsilə təşviq edilməsi, sağlam həyat tərzinin təbliği, eləcə də onlarda vətənpərlik hissinin daha da yüksəldilməsi olub. Rayon Polis Şöbələrinin əməkdaşlarının, eləcə də məktəblərin müəllimlərinin də iştirak etdiyi tədbirdə əvvəlcə Azərbaycan Respublikasının Dövlət Himni səsləndirilib, şəhidlərimizin əziz xatirəsi 1 dəqiqəlik sükutla yad olunub.


DİN-in Mətbuat Xidmətinin Şəki regional qrupundan verilən məlumata görə, görüşdə çıxış edən Daxili İşlər Nazirliyinin Polis Akademiyasının bölmə rəisi Elçin Orucov şagirdləri salamlayıb və onlara gələcək həyatlarında uğurlar arzulayıb. Daha sonra ali təhsil almaq arzusunda olan abituriyentlərə Polis Akademiyası barədə ətraflı məlumat verib, qocaman təhsil müəssisəsinin ölkəmizdə savadlı kadrların yetişməsində, daxili işlər orqanlarının hüquqşünaslarla təmin olunmasında mühüm rol oynadığını diqqətə çatdırıb. Akademiyaya kursant qəbulu qaydaları ilə bağlı abituriyentlərin suallarını cavablandıran polis polkovnik-leytenantı orada gənclərimizin hərtərəfli inkişafı üçün yaradılan müasir şərait, zəngin kitabxanalar, xarici dil kursları, laboratoriyalar, yataqxanalar və asudə vaxtlarının səmərəli təşkili məqsədilə görülən işlərdən danışıb.

Sonda Polis Akademiyasındakı tədris prosesinə, kursantların hazırlığına həsr edilmiş videoçarx nümayiş olunub.


bakunews.az