Sosial şəbəkələrdə yayılan həmin görüntülərə sakit baxmaq mümkün deyil. Məşqçinin hərəkərləri hər kəsi şoka salıb. Bu, qeyri-peşəkarlıq, qəddarlıq, səhlənkarlıq və məsuliyyətsizlikdir. Bu hadisə idman zallarında mövcud olan vəziyyəti gündəmə gətirərək, bu sahədə münasibətlərin tənzimlənməli olduğunu və nəzarətin artırılmasının vacibliyini ortaya qoydu.

Deməli, müvafiq qurumlar hərəkətə keçməlidir. İlk olaraq bu suallara aydınlıq gətirilməlidir: Hər kəs bu tip kurslarda məşqçi ola bilərmi? Xüsusilə kiçik yaşlı uşaqlara idman dərsləri keçən kəsin psixoloji durumu, keyfiyyət göstəriciləri yoxlanılırmı? Aşağı yaşlı uşaqlara qarışıq döyüş sənətinin öyrədilməsi düzgündürmü? İdman növlərindən asılı olaraq bu yaş bölgüsünə düzgün riayət olunurmu? Ümumilikdə, idman ictimaiyyətinin üzləşdiyi, ictimailəşən və ya ictimailəməyən bir sıra problemlərə aydınlıq gətirilməli və aradan qalxması təmin edilməlidir. Məşqçilik fəaliyyətini xüsusi nəzarətdə saxlamaq lazımdır. Yalnız lisenziyası olanlara məşqçi işləməyə icazə verilməlidir. Bu lisenziyaların verilməsinə nəzarət isə son dərəcə ciddi olmalıdır.

Digər tərəfdən, uşaqlarını hələ kiçik yaşlardan idman zallarına gödərməyə can atan valideynlər də diqqətli olmalıdırlar. Bu gün əksər valideynlər övladlarının, əsas da oğlan uşaqlarının fiziki cəhətdən möhkəmlənməsi üçün bu tip zallara göndərirlər. Unutmayın ki, hər yaşa uyğun idman növləri var. Çox kiçik yaşlarında uşaqlara döyüş sənətlərinin öyrədilməsinə çalışmaq doğru deyil. Həmin yaşlarda uşaqlar çox həssas olurlar, onları aqressiv ruha kökləməyin.

Bu da bir həqiqətdir ki, idman zallarında baş verən bu kimi faciələr ailələrin məşqçilərə olan inamını dərindən sarsıdır. Və bundan təkcə qeyri-peşəkar məşqçilər yox, peşəkar məşqçilər də uzun müddət ziyan çəkəcək.

Aynur Musayeva
Uşaq İnkişaf Mərkəzinin direktoru