12 Avropa ölkəsinin xarici işlər nazirləri (XİN) Avropa İttifaqının (Aİ) xarici və təhlükəsizlik məsələləri üzrə ali nümayəndəsi Cozep Borreli “xarici agentlər” haqqında qanun layihəsinə baxılarkən Gürcüstandakı vəziyyətlə bağlı təcili bəyanatla çıxış etməyə çağırıblar.

Bu barədə Gürcüstan KİV-i məlumat yayıb.

Çexiya, Danimarka, Estoniya, Finlandiya, Fransa, Almaniya, İrlandiya, Latviya, Litva, Hollandiya, Polşa və İsveçin xarici işlər nazirləri Cozep Borrelə ​​müraciətində qeyd ediblər ki, Gürcüstanın sabahkı Avropa gələcəyini təmin etmək üçün bu gün birbaşa və aydın müraciət vacibdir.

Nazirlər hesab edirlər ki, “Gürcü Arzusu” partiyasının fəxri sədri Bidzina İvanişvilinin bu yaxınlarda etdiyi çıxışdan sonra məlum olub ki, Gürcüstan hökuməti dinc etirazçılara və etirazları işıqlandıran jurnalistlərə qarşı zorakılıq tətbiq etməklə demokratik Qərbdən və onun standartlarından uzaqlaşıb.

Qeyd edək ki, bu gün Tbilisidə polis “xarici agentlər” haqqında qanun layihəsinə qarşı keçirilən etraz aksiyasında 20 nəfəri saxlayıb.