Son dövrdə İranda məskunlaşmış əfqan mühacirlər məsələsi ölkə gündəminin əsas mövzularından birinə çevrilib.
Mövzunun yenidən aktuallaşması əfqanların əsasən qeyri-qanuni yollarla İrana kütləvi axını barədə məlumat və görüntülərin yayılması ilə bağlı olub.
Əfqanıstandakı Taliban hökuməti ilə İranın münasibətlərinin heç də hamar olmaması və həmin münasibətlərdə vaxtaşırı gərginlik yaşanması kontekstində bu proses cəmiyyətdə ciddi narahatlıq doğurub. Bunun arxasında hansısa gizli niyyətlərin, hətta İranı işğal etmək planının mövcudluğu barədə mülahizələrə yol açılıb.
Hələ bu ilin yayında İran prezidentinin Əfqanıstan üzrə xüsusi nümayəndəsi Həsən Kazımi Qumi BMT Baş katibinin Əfqanıstan məsələləri üzrə köməkçisi ilə Tehranda görüşərkən, hər gün 5 min mühacirin Əfqanıstandan İrana daxil olduğunu söyləmişdi.
İndi isə bu rəqəmin iki dəfə artaraq gündə 10 min nəfərə çatdığı bildirilib. Bu da İranda daha öncə məskunlaşmış milyonlarla əfqanın sayını kəskin şəkildə artırır.
“Azad İran” “Youtube” kanalının mövzu ilə bağlı hazırladığı süjeti təqdim edirik: