Gəncə Dövlət Regional Kollecində (GDRK) imtahan, kəsir və idarəetmə prosesi ilə bağlı irəli sürülən iddialar narazılıqları daha da artırıb. Kimliyinin gizli saxlanılmasını xahiş edən bir tələbə redaksiyamıza müraciət edərək kollecdə rüşvət və maliyyə təzyiqlərinin artdığını bildirir.

Tələbənin sözlərinə görə, əvvəlki illərdə illik təhsil haqqı 500 AZN olsa da, bu il 700 AZN-ə qaldırılıb. Tələbə bildirir ki, bəzi uşaqların maddi imkanları məhduddur və valideynlər uzun saatlar işləyərək yalnız yol pulunu ödəyə bilirlər. Lakin bu artım onların təhsil almasına daha da çətinliklər yaradır.
“İllik təhsil haqqı əvvəl 500 idi, indi 700-ə qaldırdılar. Bəzi uşaqların imkanları yoxdur, valideynlər gecə-gündüz işləyir, amma yenə də ödənişlərə çatmır.”

İmtahanlarda kəsilmək və əlavə ödənişlər: “50 AZN gətirin, imtahana girin”

Tələbənin iddialarına görə, kollecdə imtahan nəticələri çoxsaylı tələbə üçün mənfi qiymətlə nəticələnir. Bəzi tələbələrə, xüsusən də tapşırılan şagirdlərə yaxşı qiymətlər verilsə də, çox sayda tələbə kəsilir. Sonra isə bu tələbələrdən 50 manat ödəniş etmələri tələb olunur.
“İmtahan nəticələri verilən tapşırıqlar ilə bağlı yaxşı olsa da, çox sayda tələbə kəsildi. O zaman deyirlər ki, 50 AZN gətirib ödəyin, imtahana girin. Bu rüşvət deyilsə, bəs nədir?”
Bu vəziyyət təhsil sistemindəki “rüşvət alqoritmini” daha da ciddi bir məsələyə çevirmiş olur.

Tələbənin irəli sürdüyü digər bir iddia isə müəllimlərin sıxışdırılmasıdır. İddialara görə, kollecdə bir çox müəllimlər müxtəlif təzyiqlərlə qarşılaşıb və könüllü şəkildə işdən çıxmağa məcbur edilirlər. Həmçinin, kollecdəki rəhbərlik tərəfindən aparılan islahatlar yalnız sözdə var, real problemlər həll olunmur.

“İmkanlar məhduddur, ödənişlər çətindir”

Bir neçə tələbənin valideynləri ilə əlaqə saxladıq. Onlar uşaqlarının təhsil haqqını ödəməkdə çətinlik çəkdiklərini və bu vəziyyətin təhsil alan şagirdlərə daha çox təzyiq yaratdığını qeyd etdilər. Valideynlər, xüsusilə yol pulu və digər xərcləri ödəməkdə çətinlik yaşadıqlarını, buna baxmayaraq əlavə ödənişlərə məcbur olduqlarını vurğulayıblar.

Tələbə, müəllim və valideynlər tərəfindən irəli sürülən bu iddialar, təhsil müəssisəsində ciddi idarəetmə problemlərini və maliyyə təzyiqlərini işıqlandırır. Həmçinin, Gəncə Dövlət Regional Kollecinin rəhbərliyi tərəfindən verilən “rüşvətsiz təhsil” açıqlamaları ilə tələbələrin və müəllimlərin qarşılaşdıqları real vəziyyət arasında ciddi uyğunsuzluq mövcuddur.Rüşvət alan müəlkimlərin direktorun himayəsində olduğundan rüşvət almaqdan və verməkdən imtina edən pedeqoji heyyət hədəf seçilib.

Gəncə Dövlət Regional Kollecinin direktoru Xoşqədəm Xudiyeva məsələyə münasibət bildirməkdən imtina etdiyindən, suallarımızı birbaşa məqalədə təqdim edirik.

Qarşı tərəfin mövqeyini öyrənmək və iddialara cavab almaq məqsədilə aşağıdakı sualları rəhbərliyə ünvanlayırıq:

👉Təhsil haqqı niyə bu il artırıldı və bu artımın əsas səbəbləri nədir? Artan ödənişlərin tələbələr üçün əlavə maliyyə yükü yaratdığını nəzərə alaraq, bu qərarın reallaşmasında sosial məsələlər nə dərəcədə nəzərə alınıb?

👉Tələbələrin 50 manat ödəniş etmələri və imtahanlara girmələri məsələsi ilə bağlı şikayətlər doğru olsa, kollecdə rüşvət almaqla bağlı hansı addımlar atılır və bu barədə nə kimi tədbirlər görülür?

👉Müəllimlərə qarşı işdən çıxarılma təzyiqləri ilə bağlı iddialarınız var. Kollecin rəhbərliyi olaraq müəllimlərə hansı dəstəyi göstərirsiniz? Bu təzyiqlər necə izah edilir?

👉“Şəffaf təhsil” siyasətinin tətbiqi ilə bağlı hansı konkret addımlar atılmaqdadır? İddia edilən problemlərin həlli üçün hansı islahatlar nəzərdə tutulub?

👉Rüşvətin qarşısın aldığınızı iddia edirsiz, o zaman müəllimlərdən dərs saatına görə, tələbələrdən isə kəsirlərə görə rüşvət tələb edən güvənli saydığınız himayənizdə olan əməkdaşlarınızla bağlı edilən şikayətlərlə bağlı Prokurorluğa niyə müraciət etmirsiniz?

Redaksiya olaraq, Gəncə Dövlət Regional Kolleci rəhbərliyinin cavablarını gözləyirik. Qarşı tərəfin mövqeyini eşitmək hüququ tam şəkildə qorunur.
Cavabı redaksiyanın elektron ünvanına göndərilməsi imkanı mövcudur.