Yasamal rayonunda bir çox sakinlər Melissa Mənzil Tikinti Kooperativi (MTK) tərəfindən təzyiqlərə məruz qalır. Redaksiyamıza daxil olan məlumatlara və video görüntülərə əsasən, MTK rəhbərliyi mənzillərini ucuz qiymətə satmaq istəməyən sakinlərə qarşı sərt addımlar atır.

Məlumata görə, bəzi hallarda sakinlər evdə olduğu halda texnika vasitəsilə mənzillər sökülüb. Bu, sakinlər arasında böyük narahatlıq və vahimə yaradıb. Ev sahibləri, xüsusilə də qadınlar və uşaqlar, baş verənlərə etiraz etsələr də, onların mülkiyyət hüquqları kobud şəkildə pozulur.

Azərbaycan qanunvericiliyinə görə, vətəndaşların razılığı olmadan mülklərinə müdaxilə edilməsi qanunsuzdur və cinayət xarakteri daşıyır. Lakin bəzi MTK rəhbərlərinin özbaşına hərəkətləri, insanlara psixoloji və fiziki təzyiqlər göstərməsi, onların mülkiyyət hüququnun tapdanması cəzasız qalır.

Sakinlər bildirirlər ki, abadlaşdırma adı altında onlara zülm edilir və mənzillərini ucuz qiymətə satmağa məcbur edilirlər. Hadisələrlə bağlı aidiyyəti qurumların təcili tədbirlər görməsi və sakinlərin hüquqlarını qoruması vacibdir. Əks halda, bu cür qanunsuzluqlar daha geniş yayılaraq sosial gərginliyə səbəb ola bilər.

Mövzu ilə bağlı rəsmi qurumların mövqeyini öyrənməyə və dərc etməyə hazırıq.