Abşeron yarımadasında yerləşən Bozdağ-Güzdək palçıq vulkanının 13 may 2024-cü il tarixli püskürməsi ilə əlaqədar olaraq ETN Geologiya və Geofizika İnstitutunun Palçıq vulkanizmi şöbəsinin əməkdaşları – Yer elmləri üzrə fəlsəfə doktoru, dosent Orxan Abbasov, elmi işçi Elnur Baloğlanov və mühəndis Elmar Səmədov adıçəkilən vulkanda tədqiqat işləri aparıblar.

İlkin araşdırmalar nəticəsində kifayət qədər aktiv olan və mütləq hündürlüyü 305 m təşkil edən palçıq vulkanının sayca 12-ci dəfə qeydə alınan püskürməsinin daha zəif olduğu aşkarlanıb.

Geologiya və Geofizika İnstitutunun əməkdaşlarının qiymətləndirmələrinə görə, Bozdağ-Güzdək palçıq vulkanının hazırkı püskürməsi nəticəsində yer səthinə çıxarılan palçıq 0,7 ha ərazini örtüb. Orta qalınlığı 0,7 m olan palçıq örtüyünün həcmi isə 5000 m3-dir. Bu, Bozdağ-Güzdək palçıq vulkanının sonuncu dəfə 2021-ci ildə baş vermiş püskürməsi ilə müqayisədə ən azı 4 dəfə kiçik göstəricidir.

Alovla müşayiət olunan püskürmə nəticəsində küləyin istiqamətinə uyğun olaraq püskürmə mərkəzindən təxminən 100 m məsafədə yeni vulkan palçığından ibarət səthlə yanaşı, həm də daha köhnə püskürmələr olan ərazilərdə ot örtüyünün xeyli yanmış əlamətləri qeydə alınıb.

Tədqiqat çərçivəsində Palçıq vulkanizmi şöbəsinin əməkdaşları püskürmə nəticəsində müxtəlif dərinliklərdən səthə tullanılan fərqli litotiplərdən ibarət süxur nümunələrini də toplayıblar. Hazırda həmin nümunələrin mineraloji və geokimyəvi analizlərinin aparılması üçün vizual araşdırmalar və emal prosesləri həyata keçirilir.