Naxçıvan-İstanbul avtobus reyslərinin uzun müddətdir dayandırılmasına Türkiyə vətəndaşları da etiraz edirlər. Reyslərin işləməməsi ən çox Naxçıvanda təhsil alan türkiyəli tələbələri çətin vəziyyətə salıb. Bir il əvvələ qədər onlar Naxçıvandan birbaşa İğdır, Qars, Ərzurum, Ankara və İstanbula avtobusla, daha ucuz qiymətə gedə bilirdilər. Hazırda isə təkcə İğdıra getmək üçün iki dəfə taksi dəyişməli olurlar ki, bu da təxminən 50 manat əlavə xərc deməkdir.
Eyni problemlə Türkiyədə işləməyə və ya müalicəyə gedib-gələn Naxçıvan sakinləri də üzləşirlər.

Naxçıvan Dövlət Universitetində təhsil alan türkiyəli tələbə A. Doğan deyir ki, mövcud vəziyyət təkcə maddi yox, həm də ciddi vaxt itkisinə səbəb olur:

“Əvvəllər 5 manata, həm də daha tez İğdıra gedib çata bilirdik. Bir ildən çoxdur ki, avtobus reysləri dayanıb. İndi gömrüyə qədər taksi ilə gedirik. Taksilər də bəzən 4 nəfər yığmaq üçün saatlarla bizi gözlədirlər. Sədərək gömrüyünə qədər gedirik, gömrüyü keçəndən sonra Türkiyə tərəfində yenidən taksi axtarmalı oluruq. Bu proses səhərdən axşama qədər çəkir və 50 manata başa gəlir. ‘Bir millət, iki dövlət’ deyirik, amma aidiyyəti qurumlar bir avtobus reysini bərpa edə bilmirlər. Kimlərsə bu vəziyyətdən pul qazanır. Biz tələb edirik ki, avtobus reysləri yenidən açılsın.”

Türkiyədə işləyən Naxçıvan şəhər sakini Eldar Bayramov da reyslərin dayandırılmasının gediş-gəlişi xeyli çətinləşdirdiyini bildirir:

“Əvvəllər İstanbuldan birbaşa Naxçıvana və əks istiqamətə bilet alırdıq. Ev üçün aldığımız əşyaları avtobusun baqajında gətirirdik, gömrükdə endirirdik, çox rahat idi. İndi İğdıra gəlirik, əşyaları orada endirib gömrüyə getmək üçün taksi axtarırıq. Bəzən saatlarla vaxt itiririk. Gömrüyü keçəndən sonra yenə Naxçıvana gedən taksi gözləməli oluruq. Hər gediş-gəlişdə əlavə 60 manat xərc çıxır. Qayıdanda da eyni problemi yaşayırıq.”

Qeyd edək ki, Naxçıvandan Türkiyəyə və əks istiqamətə işləyən avtobus reysləri sonuncu dəfə 2024-cü ilin dekabrından dayandırılıb.
"Gündəlik Naxçıvan"