"1 milyard dollardan artıq əmlakı olan Ruben Vardanyanın Rusiya vətəndaşlığından imtina edib, Xankəndinə yerləşməsinə sıradan hadisə kimi baxmıram".

Bunu bakunews.az milli.az-a istinaden açıqlamasında "Atlas" Araşdırmalar Mərkəzinin rəhbəri Elxan Şahinoğlu deyib.

O bildirib ki, Kremlin Araik Arutyunyanı Ruben Vardanyanla əvəz etmək etmək planının varlığı istisna edilmir:

"Bu 44 günlük müharibədən sonra Azərbaycana qarşı həyata keçirilən növbəti və yaxşı planlanan təxribatdır. Vardanyanın Qarabağdan rus dilində yaydığı həmin paylaşımda digər imkanlı ermənilərə də Qarabağa köçməyə çağırış edib.

Rusiyada rahat həyat yaşayan və yaxşı pullar qazanan erməni niyə səfalət içində və Azərbaycan ordusunun nişangahında olan bölgəyə köçsün ki?

Əksinə imkanı olan erməni Qarabağı və Ermənistanı tərk etməyə çalışır. O biri tərəfdən Vardanyan Qarabağ ermənisi də deyil. Köçməyə qaldıqda gərək Ermənistanın keçmiş prezidentləri, xüsusilə də Qarabağ doğumlu Robert Köçəryan və Serj Sərkisyan qayıtmalıydılar. Ancaq onlar daha təhlükəsiz yerdə yaşamağa üstünlük verirlər.

Vardanyan Rusiya hakimiyyət təmsilçiləri ilə sıx bağlıdır. Demək, bu təxribatın arxasında Rusiyadakı siyasi dairələr dayana bilər. Məqsəd Azərbaycan ordusunun sonrakı irəliləmələrini müxtəlif yollarla əngəlləməkdir. Vardanyan Rusiyadan qazandığı pulları Qarabağın separatçıların nəzarətində olan hissəsində xərcləməyə başlayacaq. Moskva separatçıların lideri Araik Arutyunyanı Ermənistanın baş naziri Nikol Paşinyanın adamı kimi dəyərləndirir.

Kremlin Araik Arutyunyanı Ruben Vardanyanla əvəz etmək etmək planının varlığı istisna edilmir. Araik Arutyunyan erməni əsilli keçmiş rusiyalı oliqarxın əhatəsində özünü gərgin hiss etməyə başlayacaq. Ruben Vardanyanın "Qarabağa gəlin" çağırışına başqa imkanlı ermənilərin səs verəcəyini istisna etmək olmaz.

Laçına alternativ yol tikdik, orda da əli silahlı separatçılar peyda olublar. Növbəti çağırışlarla üz-üzəyik, cavabımız nə olacaq?

Bu haqda düşünməliyik. Ordumuz öz işini görür və görəcək, ancaq Ruben Vardanyanın siyasi gedişinə harda yaşamasından asılı olmayaraq hansısa azərbaycanlı oliqarxın da biznesini Şuşa və ya Laçından idarə etməyə qərar verməsi yerində olmazdımı?

Hesab edilə bilər ki, Vardanyanın Rusiya vətəndaşlığından imtina etməsi sanksiyalardan yaxa qurtarmaq istəyi ilə bağlıdır, amma Vardanyan özünü Qərbin sanksiyalarından qorumaq istəyirdisə, doğulduğu Ermənistana köçə bilərdi. Fikrimcə, onun Qarabağı seçməsi siyasi hədəflərindən irəli gəlir. Bu planın Kremldə hazırlandığı ehtimalını yüksək qiymətləndirirəm".

bakunews.az