Sumqayıt şəhərində ilk dəfə 2025-2026-cı tədris ili üçün uşaqların birinci sinfə elektron qeydiyyatı prosesində ərazi prinsipi tətbiq olunacaq.

Şagird sıxlığının qarşısını almaq üçün ərazi prinsipi tətbiq olunan bir sıra məktəblərdə, həmin təhsil müəssisələrinin mikroərazisində daimi qeydiyyatda olan vətəndaşlar övladlarını elektron sistem vasitəsilə qeydiyyatdan keçirə biləcəklər. Eyni zamanda şagirdlərin məktəblərə qəbulu zamanı valideynlərindən biri (qanuni nümayəndələri) həmin məktəbdə işləyənlər, bacısı və ya qardaşı həmin məktəbdə təhsil alanlar prioritet kimi nəzərə alınacaqdır.

Müvafiq ərazidə daimi qeydiyyatı olmayan valideynlər şagird sıxlığı olmayan məktəblərə, eləcədə müəyyən edilmiş müddətdən sonra prioritet tətbiq edilən məktəblərdə boş qalan yerlərə sərbəst qaydada sorğu yerləşdirə bilərlər.

Qeyd edək ki, I sinfə qəbulla bağlı mikroərazilər məktəblərin yerləşdiyi dislokasiyaya uyğun olaraq müəyyənləşdirilib.

Vətəndaşlar müvafiq linkə daxil olaraq daimi qeydiyyat ünvanının (yeni inşa olunmuş binalarda “Azərişıq” ASC-nin abonent kodu öz adına olan evlərin ünvanının) dislokasiyada olmasını dəqiqləşdirməlidirlər. Daimi qeydiyyat ünvanı (yeni inşa olunmuş binalarda “Azərişıq” ASC-nin abonent kodu öz adına olan evlərin ünvanı) dislokasiyada olmayan valideynlər 17 fevral – 3 mart 2025-ci il tarixlərində Sumqayıt şəhər 2 saylı “ASAN xidmət” mərkəzinin təhsil xidmətləri bölməsinə yaxınlaşaraq müvafiq formanı doldurmaqla təklif və rəylərini verə bilərlər.

Əlavə sualı olan vətəndaşlar Abşeron-Xızı Regional Təhsil İdarəsinin Çağrı Mərkəzinə (146-0-1) zəng edə və ya info@sumgayit.edu.gov.az elektron poçt ünvanına yaza bilərlər.

Qeyd edək ki, ümumi təhsil müəssisələrinin I siniflərinə qeydiyyat prosesi www.mektebeqebul.edu.az elektron portalı vasitəsilə aparılır. Ümumi təhsil məktəblərinin I siniflərinə şagird qəbulu elan olunduqdan sonra əvvəlcə elektron sistemdə qeydiyyat, daha sonra isə məktəb seçimi prosesi aktivləşdirilir.

Sumqayıt şəhəri üzrə prioritet tətbiq olunan məktəblərin siyahısı:

1. Abşeron-Xızı Regional İdarə Sumqayıt İsmət Qayıbov adına 1 nömrəli tam orta ümumtəhsil məktəbi, Azərbaycan və rus

2. Abşeron-Xızı Regional İdarə Sumqayıt 11 nömrəli tam orta ümumtəhsil məktəbi, Azərbaycan və rus

3. Abşeron-Xızı Regional İdarə Sumqayıt 23 nömrəli tam orta ümumtəhsil məktəbi, Azərbaycan və rus

4. Abşeron-Xızı Regional İdarə Sumqayıt Polad Həşimov adına 28 nömrəli tam orta ümumtəhsil məktəbi, Azərbaycan