Nizami rayonunda yerləşən 10 nömrəli məktəbdə rüşvət iddiaları: Valideynlər narazıdır

Bakunews.az xəbər portalına daxil olan məlumatlara əsasən, son günlərdə ümumtəhsil məktəblərində rüşvət və korrupsiya ilə bağlı şikayətlər artmaqdadır. Bu kimi halların təhsil sistemində baş verməsi cəmiyyətdə narahatlıq doğurur və ciddi suallar doğurur: Dövlət məktəbində təhsil alan valideynlər nə üçün məktəbin xərclərini öz ciblərindən qarşılamalıdır?

Şikayətlərə əsasən, Bakı şəhəri Nizami rayonunda yerləşən 10 nömrəli tam orta məktəbdə qanunsuz pul yığımı və rüşvət iddiaları səngimək bilmir. Xüsusilə ibtidai siniflər üzrə ciddi narazılıqlar mövcuddur.

Valideynlərin bildirdiyinə görə, 1a sinfinin rəhbəri Qurbanova Pərinisə tərəfindən valideynlərdən qəzet pulu adı ilə 2 manat məbləğində vəsait toplanır. Daha da narahatedici məqam odur ki, həmin müəllimə sinifdə dərs keçmək əvəzinə, bu işi valideynlərdən birinə həvalə edir. Belə halların dövlət təhsil müəssisəsində baş verməsi həm valideynləri, həm də təhsil ictimaiyyətini haqlı olaraq narahat edir.

Qeyd edək ki, təhsil naziri dəfələrlə qeyd edib ki, məktəblərdə pul yığımı yolverilməzdir və bu cür hallar aşkarlandığı təqdirdə ciddi tədbirlər görüləcək. Nazirlikdən verilən rəsmi mövqedə bildirilir ki, bu kimi halların araşdırılması və qanunvericiliyə uyğun şəkildə hüquqi qiymət verilməsi təmin olunmalıdır.

Bütün bu baş verənlər fonunda maraqlı bir sual da yaranır: 10 nömrəli məktəbin direktoru Şəfayət Orucov Təhsil Nazirliyinin mövqeyinə qarşı çıxır?

Bakunews.az olaraq məsələ ilə bağlı araşdırmalarımız davam edir. Qarşı tərəfin mövqe bizim üçün önəmli olduğundan dinləməyə hazırıq. Veriləcək münasibət olduğu kimi dərc ediləcəkdir