"Bir millətin gələcəyi onun təhsilinə bağlıdır" – bu, yalnızca şüar deyil, tarix boyu sübut olunmuş həqiqətdir. Lakin bu gün Azərbaycan reallığında təhsil sisteminin cəmiyyətin inkişafında nə qədər zəif rol oynadığı ürəkağrıdıcı mənzərə yaradır. Təəssüf ki, təhsil artıq cəmiyyətin təməlini formalaşdıran sütun deyil, inamsızlıq doğuran bir sahəyə çevrilib.

Emin Əmrullayevin Elm və Təhsil Nazirliyinə rəhbər təyin olunmasından sonra ictimaiyyətin ümidləri çox idi. Amma bu ümidlər tezliklə sərt tənqidlərə çevrildi. Təsəvvürə sığmayan qərarları, şəffaflıqdan uzaq təyinatları, təhsil ocaqlarındakı nizamsızlıq, əsaslandırılmayan dəyişikliklər və sistemsizlik – bütün bunlar təhsil ekspertləri, valideynlər və ictimaiyyət tərəfindən qınaqla qarşılandı.

Etibarlı mənbələrin verdiyi məlumata görə, artıq yuxarı dairələrdə də narazılıq baş qaldırıb. Təhsil sistemində bir çox şəxslərin vəzifədən azad edilməsi də bu narazılıqların ilkin nəticəsi olaraq dəyərləndirilir. İndi isə yayılan məlumatlar daha da maraqlıdır: Emin Əmrullayev vəzifəsini tərk etməyə hazırlaşır və onu əvəz edəcək şəxsin adı artıq “gizli” deyil – Ülkər Səttarova.

Lakin bu dəyişiklik inam yaratmaq əvəzinə suallar doğurur. Çünki Ülkər Səttarovanın rəhbər təyinatları, xüsusilə kolleclərdə rəhbərlik edən şəxslərin fəaliyyətsizliyi, neqativ hallarla gündəmə gəlməsi, onun da imicinə kölgə salıb. Əgər bu dəyişiklik sadəcə adların dəyişməsi, sistemin isə olduğu kimi qalması ilə nəticələnəcəksə, bu rotasiyanın təhsilə heç bir müsbət təsiri olmayacaq.

Bugünkü vəziyyət göstərir ki, təhsil nazirinin kim olmasından daha önəmlisi təhsilə yanaşmanın, idarəetmə fəlsəfəsinin dəyişməsidir. Əks halda, dəyişən sadəcə kreslolar olacaq, itirilən isə bütöv bir nəsil olacaq.

Azərbaycanın gələcəyi üçün təhsil təkcə idarə olunmalı yox, dərk edilməlidir.

Mirkənan Seyidov
Bakunews.az