Xaçmaz rayonunun Müşkür kənd sakini Yaqubova Naila Fikrət qızı tərəfindən müxtəlif dövlət qurumlarına ünvanlanan müraciətlərə verilən cavablar ictimai narahatlıq doğurur. Vətəndaşın iddiasına görə, o, təhdid və psixoloji təzyiqlərə məruz qalıb, bu hallar onun psixoloji vəziyyətinə ciddi təsir göstərib. Lakin aidiyyəti qurumlar məsələni formal araşdırma ilə bağlayıblar.
Təhsil qurumunun cavabı: fakt təsdiqlənir, amma məsuliyyət yoxdur.

Azərbaycan Respublikası Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyinin Quba–Xaçmaz Regional Təhsil İdarəsi tərəfindən vətəndaşa ünvanlanan rəsmi məktubda maraqlı məqamlar yer alır.

Belə ki, məktubda bildirilir ki, Naila Yaqubovanın Prezident Administrasiyasına ünvanladığı müraciət araşdırılıb və fərdi şəkildə idarə etdiyi mağazada azyaşlılara tütün məmulatlarının, enerji içkilərinin və qazlı içkilərin satışı halları müşahidə olunub.
Rəsmi qurum bu faktı dolayı yolla təsdiqləsə də, yalnız “maarifləndirici söhbət aparıldığını” və şagirdlərə bu məhsullardan uzaq durmağın tövsiyə edildiyini bildirir. Maraqlı sual isə cavabsız qalır:

👉 Əgər qanun pozuntusu müşahidə olunubsa, niyə inzibati tədbir görülməyib?
👉 Satışı həyata keçirən obyektlə bağlı hansı nəzarət mexanizmi tətbiq edilib?

Qanunvericiliyə əsasən, 18 yaşına çatmayanlara tütün və enerji içkilərinin satışı qadağandır. Lakin məktubda nə cərimə, nə də obyektlə bağlı hüquqi addım barədə məlumat verilir.

Daxili İşlər Nazirliyinin cavabı: “cinayət tərkibi yoxdur”
Vətəndaşın ikinci müraciəti isə Azərbaycan Respublikası Daxili İşlər Nazirliyinin Baş İstintaq və Təhqiqat İdarəsi tərəfindən araşdırılıb.

Məktubda qeyd olunur ki, Nərmin Rüstəmova tərəfindən Naila Yaqubovaya qarşı hədə-qorxu və digər qanunsuz hərəkətlər barədə iddialar Xaçmaz Rayon Polis Şöbəsində araşdırılıb. Toplanmış sübutlara əsasən, əməlində cinayət tərkibi olmadığı qənaətinə gəlinib və Cinayət-Prosessual Məcəllənin 39.1.2-ci maddəsinə əsasən cinayət işinin başlanması rədd edilib.

Lakin müraciətdə ən ağır məqam — vətəndaşın intihara sürüklənəcək həddə psixoloji təzyiq gördüyü iddiası — faktiki olaraq hüquqi qiymət almır.

Burada da ciddi suallar yaranır:
👉 Şəxsin psixoloji vəziyyətinə təsir edən təhdidlər niyə ayrıca qiymətləndirilməyib?
👉 “Cinayət tərkibi yoxdur” qərarı hansı ekspert rəyinə əsaslanıb?

Şikayət hüququ var, amma real nəticə yoxdur

DİN məktubunda vətəndaşın prokurorluğa və məhkəməyə şikayət etmək hüququnun olduğu qeyd edilsə də, bu cür cavablar faktiki olaraq məsuliyyəti vətəndaşın üzərinə ötürür.
Digər tərəfdən, müraciətin Xaçmaz Rayon Prokurorluğuna göndərildiyi bildirilsə də, indiyədək hər hansı real hüquqi nəticə barədə məlumat yoxdur.
Nəticə: problem tanınır, amma həll edilmir.

Ortaya çıxan mənzərə belədir:
✔️ Qanun pozuntusu müşahidə olunur
✔️ Təzyiq iddiaları araşdırılır
❌ Amma heç bir real məsuliyyət və tədbir yoxdur

Bu isə vətəndaşlarda haqlı sual yaradır:
Dövlət qurumları problemi niyə yalnız kağız üzərində “araşdırılmış” sayır?
Məsələ ilə bağlı Xaçmaz Rayon Prokurorluğunun, yerli icra strukturlarının və DİN rəhbərliyinin mövqeyini öyrənməyə çalışacağıq.

Qeyd edək ki, Daxili İşlər Nazirliyindən məsələ ilə bağlı açıqlama verilib. Vətəndaşın şikayəti üzrə amıqlama verilmişdir. Polisə həmin vətəndaşın qeyd edilən məsələ ilə bağlı müraciəti daxil olub. DİN-in Mətbuat Xidmətinin Quba Regional Qrupundan bildirilib ki, müraciət əsasında Xaçmaz RPŞ-də araşdırmalar davam etdirilir. Araşdırmanın nəticəsindən asılı olaraq məsələyə hüquqi qiymət veriləcək.

Mövzu diqqətimizdədir.