Armudpadarda kütləvi meşə qırıntısı: Sakinlər təhlükədən narahatdır – “Ekologiya Nazirliyi hara baxır?
Xaçmaz rayonunun Armudpadar kəndi ərazisində yerləşən meşə zolağında ağacların kütləvi şəkildə kəsildiyi bildirilir. Sakinlərin sözlərinə görə, ərazidə eyni zamanda süni göl qazıntısı aparılır və kəsilən ağacların əksəriyyətini Qızılağac ağacları təşkil edir. Məlumata görə, işlərin aparıldığı sahədən qaz xətti keçir və bu, həm təhlükə riskini artırır, həm də qanunvericiliyə zidd müdaxilə ehtimalını gücləndirir.
Daxili İşlər Nazirliyinin Mətbuat Xidmətinin Quba regional qrupundan verilən açıqlamada qeyd olunur ki, faktla bağlı araşdırma aparılır və nəticələrdən asılı olaraq əmələ hüquqi qiymət veriləcək.
Bakunews-a danışan sakinlər bildiriblər ki, meşə zolağında aparılan işlər barədə onlara heç bir rəsmi məlumat təqdim olunmayıb. Onların sözlərinə görə, meşə fonduna aid ərazidə bu miqyasda ağac qırıntısının aparılması ciddi narahatlıq doğurur və belə vəziyyətdə əsas sual ortaya çıxır:
“Ekologiya və Təbii Sərvətlər Nazirliyi hara baxır?”
Sakinlər ümid edirlər ki, məsələ ictimaiyətləşdikdən sonra aidiyyəti qurumlar qanunsuzluğa yol verən şəxslərlə bağlı müvafiq tədbirlər görəcək, hüquqi qiymət veriləcək və meşə qırğının qarşısı alınacaq.
Əlaqə whatsapp:+994 70 402 02 85
BakuNews.az
