Macarıstanın paytaxtı Budapeşt şəhərində ölkəmizin Zəfər Gününə həsr olunmuş bayram tədbiri keçirilib.
Azərbaycanın Macarıstandakı səfirliyinin və Budapeşt Azərbaycan Evinin birgə təşkilatçılığı ilə baş tutan tədbirdə Azərbaycan diasporunun üzvləri, Macarıstanda təhsil alan azərbaycanlı tələbələr, yerli ictimaiyyətin və medianın təmsilçiləri iştirak ediblər. Azərbaycanın Dövlət Himninin səsləndirilməsi ilə başlayan tədbirdə ölkəmizin ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib.
Azərbaycanın Macarıstandakı səfiri Tahir Tağızadə, Budapeşt Azərbaycan Evinin rəhbəri İbrahim Səfərli çıxış edərək, tədbir iştirakçılarını 8 Noyabr – Zəfər Günü və 9 Noyabr – Dövlət Bayrağı Günü münasibətilə təbrik ediblər. Natiqlər bu ilin “Heydər Əliyev İli” elan edildiyini xatırladaraq, ulu öndərin ölkəmizin tarixindəki əvəzsiz rolundan, bütün sahələrdə, o cümlədən diaspor quruculuğu və təhsil sahələrində həyata keçirdiyi siyasətdən danışıblar. Onun əsasını qoyduğu və Müzəffər Ali Baş Komandan, Prezident İlham Əliyev tərəfindən davam etdirilən uzaqgörən siyasət nəticəsində şanlı Ordumuzun ərazi bütövlüyümüzü tam bərpa etdiyi, Xankəndidə Zəfər paradının keçirilməsinin qürurverici hal olduğu diqqətə çatdırılıb.
Bədii hissədə Bakı şəhəri H.Sarabski adına 7 saylı musiqi məktəbinin gənc və istedadlı şagirdlərinin ifasında konsert proqramı təqdim olunub. Tədbir çərçivəsində Heydər Əliyev Fondu və Azərbaycan Dövlət İnformasiya Agentliyinin (AZƏRTAC) dəstəyi ilə ulu öndərin həyat və fəaliyyətini əks etdirən
fotosərgi təşkil edilib.