Redaksiyamıza müraciət edən Ağstafa rayon sakini Rəsul Əsgərovun müraciətini təqdim edirik: “Mən Ələsgərov Rəsul Habil oğlu 2020-ci ilin Sentyabr ayının 7-si Azərbaycan Silahlı qüvvələrin Müdafiə Nazirliyinin “N” saylı hərbi hissəsində Müddətdən artıq həqiqi hərbi xidmətə (MAXE) başlamışam. 27.09.2020-ci il tarixində Kəlbəcər rayonu azadlığı uğrunda gedən döyüşlərdə canla başla canımı və qanımı əsirgəmədən iştirak etmişəm və 44 günlük Vətən müharibəsində baş beyin xəsarətləri almışam və buna baxmayaraq döyüşləri davam etdirmişəm canım və qanım bahasına döyüşlərdə baş beyin xəsarətləri zaman hər iki gözümün çox pis vəziyyətdə görür. Və buna baxmayaraq xidmətimi davam elətdirmişəm xidməti dövrümdə xroniki hepatit "B" virüsuna yolmuxmuşam və Vətənim Azərbaycan üçün canımı və qanımı əsirgəmədən Vətənimə xidmətimi davam elətdirmişəm və 2023-cü ilin dekabrın 12-sində məni hərbi xidmətdən ehtiyata buraxıblar və məndə olan psixoloji problemlər və səhhətimdə olan problemlərə görə iş qabiliyyətimi itirmişəm. Və dəfələrlə Səhiyyə nazirliyinin Maştağa Psixi xəstəxanasında dəfələrlə müalicə almışam və buna baxmayaraq səhhətimdə baş verənlərlə əlaqədar vəziyyətim çox pisdir. Buna görə psixoloji dərmanlar qəbul eləyirəm və dəfələrlə intihara cəhd etmişəm Ağstafa rayonu icra hakimiyyətində və Ağstafa rayon mərkəzi xəstəxanasında və Dövlət təhlükəsizlik xidmətinin binasında və Axırıncı dəfə Əmək və Əhalinin sosial müdafiəsi nazirliyinin binasında boğaz nayihəmə ülgüclə(levza) ilə ağır xəsarətlər yetirmişəm və hələdə mənim əlillyim təyin olunmayıb çox xahiş eləyirəm mənim haqqımı verin mənim Vətənim üçün çəkdiyim əziyyətləri yerdə qoymayın Vaxtı ilə canından qanından keçənləri canından bezdirməsinlər Qazi intiharlarına Son qoyulsun”

Azərbaycanın müstəqilliyi, ərazi bütövlüyü və azadlığı uğrunda canını və qanını əsirgəmədən döyüşən qəhrəmanlardan biri də Ələsgərov Rəsul Habil oğludur. O, 2020-ci ilin sentyabr ayında Azərbaycan Silahlı Qüvvələrinin Müdafiə Nazirliyinin “N” saylı hərbi hissəsində müddətdən artıq həqiqi hərbi xidmətə (MAXE) başlayıb və 44 günlük Vətən Müharibəsində əsl igidlik göstərərək, Kəlbəcər rayonu istiqamətində gedən döyüşlərdə fəal iştirak edib.

Fədakarlıqla dolu xidmət yolu

Rəsul bəy Vətən torpaqlarının işğaldan azad olunması uğrunda aparılan döyüşlərdə böyük cəsarət göstərmiş və döyüş meydanında ağır beyin xəsarətləri almışdır. O, buna baxmayaraq, xidmətini davam etdirərək döyüşlərdə iştirak etməyi vəzifə borcu saymışdır. Xəsarətlər nəticəsində onun görmə qabiliyyəti ciddi şəkildə zəifləmiş, hər iki gözündə ciddi problemlər yaranmışdır. Lakin sağlamlıq vəziyyətinin pisləşməsinə baxmayaraq, o, dövlətinə və xalqına xidmət etməkdən imtina etməmişdir.

Müharibə başa çatdıqdan sonra belə, Rəsul bəy ordu sıralarında qalmağa davam etmiş, lakin xidməti dövründə xroniki hepatit "B" virusuna yoluxmuş və nəticədə sağlamlığı daha da pisləşmişdir. Nəhayət, 2023-cü ilin dekabr ayında, artıq səhhətindəki ciddi problemlərə görə onu ehtiyata buraxıblar.

Haqqını ala bilməyən qəhrəman

Rəsul bəy, xidmət müddətində aldığı ağır yaralar və keçirdiyi xəstəliklər səbəbindən iş qabiliyyətini demək olar ki, tamamilə itirib. Buna baxmayaraq, o, Əmək və Əhalinin Sosial Müdafiəsi Nazirliyinə dəfələrlə müraciət etsə də, lazımi dərəcədə diqqət və dəstək görməyib. Vətən uğrunda öz canını qurban verməyə hazır olan bir qazinin belə laqeydliklə qarşılaşması isə həm Rəsul bəyin, həm də onun kimi digər qazilərimizin hüquqlarının pozulduğunu açıq-aşkar göstərir.

Sosial Müdafiə Nazirliyinə etdiyi müraciətlərə rəğmən, Rəsul bəyə əlillik statusu təyin edilməyib. Halbuki, onun keçirdiyi psixoloji travmalar və ağır yaralanmalar səbəbindən müalicəyə ehtiyacı olduğu hər kəsə bəllidir. Hətta vəziyyət o həddə çatıb ki, o, intihara cəhd edib, müxtəlif dövlət qurumlarının binalarında öz həyatına son qoymağa çalışıb. Bütün bu hadisələr dövlət qurumlarının vəzifə borcuna laqeyd yanaşması nəticəsində baş verib.

Sosial müdafiənin vəzifəsi nədir?

Azərbaycan dövləti qazilərinə, şəhid ailələrinə və müharibə iştirakçılarına xüsusi qayğı ilə yanaşmalı, onların ehtiyaclarını ödəmək üçün hər cür tədbir görməlidir. Lakin Ələsgərov Rəsul bəy kimi fədakar insanlar dövlət qurumlarından lazımi dəstəyi ala bilmədikdə, bu, həm cəmiyyətdə böyük məyusluq yaradır, həm də qəhrəmanlarımızın ruhuna hörmətsizlik kimi dəyərləndirilir.

Sosial Müdafiə Nazirliyi, xüsusilə qazilərin müraciətlərinə daha həssas yanaşmalı, onların hüquqlarının qorunmasına önəm verməlidir. Əgər Rəsul bəy kimi müharibə iştirakçıları vaxtında lazımi dəstəyi almasalar, bu, cəmiyyətdə dövlət qurumlarına olan inamı ciddi şəkildə sarsıda bilər.


Dövlət Tibbi-Sosial Ekspertiza Agentliyinin münasibəti:

Ağstafa rayon sakini 19.11.1999-cu il təvəllüdlü Ələsgərov Rəsul Habil oğlu əlilliyinin qiymətləndirilməsi ilə bağlı tibb müəssisəsi tərəfindən rəsmiləşdirilən forma-88 göndərişi əsasında 18.10.2024-cü il tarixdə Dövlət Tibbi-Sosial Ekspertiza Agentliyində əyani müayinə edilib.
Səhiyyə Nazirliyinin və Agentliyin həkim-ekspertlərinin birgə müayinəsi zamanı şəxsin hazırki sağlamlıq vəziyyətində əlillik təyinatına əsas verən əlamətlər müşahidə olunmayıb. Eyni zamanda vətəndaş əyani müayinə zamanı travma haqqında arayış təqdim etməyib. Hərbi biletdə qeyd olunub ki, R.Ələsgərov xəstəliklə əlaqədar deyil, xidmət müddəti başa çatdığına görə ehtiyata buraxılıb.
Bu səbəbdən də Nazirlər Kabinetinin 13 may 2022-ci il tarixli 187 nömrəli qərarı ilə təsdiq edilmiş “Əlilliyin müəyyən olunması meyarları”na uyğun olaraq Diaqnoz əlillik əlaməti təyin etmir barədə qərar qəbul edilib.