Son zamanlar qida təhlükəsizliyi və ictimai iaşə obyektlərinin fəaliyyəti cəmiyyətdə ciddi narahatlıq doğurur. Xüsusilə də paytaxtda fəaliyyət göstərən bəzi restoran və kafelərin gigiyena, sanitariya və əmək qanunvericiliyinə riayət etməməsi suallar doğurur. Jurnalist araşdırmaları nəticəsində belə obyektlərdən biri – Bakının mərkəzində, Nizami küçəsində yerləşən "Burger Yeyelim" restoranında bir sıra qanunsuzluqlar aşkar edilib.

Araşdırmalar zamanı məlum olub ki, müştərilərə kassa qəbzi təqdim edilmir. Restoran işçiləri əmək müqaviləsi olmadan çalışır və onların tibbi müayinədən keçmədiyi məlumdur. Bu isə həm əmək hüquqlarının pozulması, həm də istehlakçıların sağlamlığı baxımından ciddi təhlükə deməkdir. Həmçinin restoranda çalışan bəzi əcnəbi vətəndaşların – konkret olaraq Türkiyə vətəndaşlarının – miqrasiya sənədlərinin qaydasında olmaması da diqqət çəkir.

Digər bir problem – restoranın qarşısında təxminən 100 kvadratmetrlik sahənin zəbt olunması və bu sahənin ictimai istifadə üçün əlçatan olmamasıdır. Sakinlərin və piyadaların sərbəst hərəkəti üçün nəzərdə tutulan ərazi stol və stullarla zəbt olunub, şüşə hasarlarla əhatələnib.

Restoranın adı da ictimai müzakirələrə səbəb olub. Dövlət dili haqqında qanuna əsasən, kommersiya obyektlərinin adları Azərbaycan dilində yazılmalı və ictimai yerlərdəki reklamlar dövlət dilində olmalıdır. Bu baxımdan "Burger Yeyelim" adının hüquqi aspektdən nə dərəcədə qanuni olduğu aidiyyəti qurumlar tərəfindən araşdırılmalıdır.

Vurğulamaq lazımdır ki, burada əsas məsələ milli və ya etnik mənsubiyyət deyil. Türkiyə vətəndaşları ilə Azərbaycan xalqı arasında dostluq və qardaşlıq münasibətləri tarixən mövcuddur. Lakin bu münasibətlər qanunların pozulmasına əsas verməməlidir. Əgər hər hansı bir şəxs və ya obyekt bu və ya digər şəkildə qanunları pozursa, bu hallara hüquqi qiymət verilməli və lazımi tədbirlər görülməlidir.

Səbail Rayon İcra Hakimiyyətinin ərazisi hesab edilən məsələyə yəqin ki səlahiyyətli şəxslər cavab verəcəkdir. İcra hakimiyyətinin məsələdən xəbərsiz olması isə qeyri mümkündurumdur. Buna hansı açıqlama veriləcəyidə bizə maraqlıdır.

Mövzu ilə bağlı rəsmi qurumların münasibəti və mövqeyi də maraqla gözlənilir.