Bakunews.az xəbər portalına daxil olan şikayət məktubunda Müdafiə Sənayesi Nazirliyinin tabeliyində fəaliyyət göstərən zavodların əməkdaşları hazırkı vəziyyətdən dərin narazılıqlarını bildiriblər. Məlumata görə, Prezident İlham Əliyevin 18 noyabr 2023-cü il tarixli sərəncamı ilə Vüqar Mustafayevin Müdafiə Sənayesi Naziri vəzifəsinə təyin edilməsindən sonra müəssisələrdə gözlənilən inkişaf əvəzinə kadr islahatları adı altında xaos yaranıb.

“Mərhum nazirin qurduğu sistem dağıdılır”

İşçilər bildirirlər ki, mərhum nazir Yavər Camalovun qurduğu sənaye və istehsalat strukturu hazırkı nazir tərəfindən demək olar ki, tamamilə dağıdılıb. Tabelikdə olan müəssisələrə istehsalatdan bixəbər şəxslər təyin olunub, peşəkar mühəndis və texniki heyət isə diqqətdən kənarda qalıb.

Əməkhaqqı ayrı-seçkiliyi: “Kimi gətiriblərsə, yüksək maaş alır”

İddialara görə, Nazirliyin tabeliyində olan Zireh MMC və Azərsilah QSC-də yeni təyin olunan şəxslərə yüksək əməkhaqqı, bonus və mükafatlar verildiyi halda, illərlə bu sahədə çalışan təcrübəli mühəndis və fəhlələr köhnə əməkhaqqı ilə işləməyə məcbur edilir. Halbuki eyni əmək müqaviləsi əsasında çalışan işçilərin maaşlarında bu qədər fərq qanunsuz sayılır.

“İş yoxdur” adı ilə maaşlar kəsilir, lakin bonuslar artırılır

Zavodlarda çalışan fəhlə sinfi – tornaçılar, frezçilər, mexaniklər, hər ay “iş yoxdur” bəhanəsi ilə maaşlarının bir hissəsinin verilməməsindən şikayətçidirlər. Əvəzində isə istehsalatdan anlayışı olmayan bəzi kadrlar 2-3 qat artıq maaş alır.

Məsələ ilə bağlı adıyatı şəxslərin və müəssisənin mövqeyni dinləməyə hazırıq.