Bakının Nəsimi rayonunda qadınlar arasında mübahisə dava ilə nəticələnib.

Xalq-ın əldə etdiyi xəbərə görə, hadisə Nəsimi rayonu, Vaqif prospektində yerləşən “Papaq Lounge” restoranında baş verib.

Bakı şəhər sakini, 1968-ci il təvəllüdlü Vüsalə Babayeva həmin restoranın mətbəxində iş yoldaşı Sahibə Ağayeva (ad-soyad şərti verilib – red.) ilə mübahisə edib.

Aralarında şəxsi münasibətlər zəminində yaranmış mübahisə zamanı Sahibənin baş nahiyəsinə əli ilə qəsdən bir neçə dəfə zərbə vurub. Ona müxtəlif dərəcəli bədən xəsarətləri yetirib.

Hadisəni törədən V. Babayevanın barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.

Cinayət işi üzrə ifadə verən təqsirləndirilən şəxs ona elan olunmuş ittiham üzrə özünü təqsirli bilib.

O, ifadəsində göstərib ki, Nəsimi rayonu, Vaqif prospektində yerləşən “Papaq Lounge”da xadimə işləyir:

“Hadisə günü, təxminən saat 14:45-də iş yerində mətbəxdə olan zaman iş yoldaşım Sahibə məndən yuyucu tozun harada olmasını soruşdu. Həmin yuyucu toz mətbəxdə masanın üzərində olduğu üçün ona cavab vermədim. Ona cavab vermədiyim üçün mətbəxdən çıxan zaman dilinin altında məni təhqir etdi. Sahibənin bu təhqirindən əsəbləşərək onun arxasınca getdim və saçından tutaraq dartdım. Bu zaman Sahibə də mənim saçımdan dartdı. Bundan sonra zərərçəkmiş restorandan əşyalarını götürdü, sonra isə getdi. Mən onu vurmamışam. Məni təhqir etdiyi üçün cavab olaraq onun saçını yolmuşam. Həmin vaxt mənim də üzüm göyərib. Lakin mən heç bir yerə müraciət etməmişəm, tibbi ekspertizadan keçməmişəm”.

Təqsirləndirilən şəxs ifadəsində qeyd edib ki, “Papaq Lounge” restoranında təmizlikçi işləyib.

İş üzrə zərərçəkmiş S. Ağayevanın sözlərinə görə, 2024-cü ilin oktyabr ayından “Papaq Lounge” restoranın da xadimə işləyir:

“Hadisə günü, təxminən saat 14:45-də işdə restoranın mətbəxində olan zaman iş yoldaşım Vüsalədən yuyucu tozun harada olmasını soruşdum. Təqsirləndirilən şəxs mənə cavab vermədi. Mən bir qədər ətrafı axtarsam da, yuyucu tozu tapa bilmədim. İşlərimi görə bilmədiyim üçün Vüsalədən bır neçə dəfə də təkrar olaraq yuyucu tozun yerini soruşdum. Buna baxmayaraq, yenə də cavab vermədi. Bunda sonra ona “mən işlərimi görməliyəm, bu təmizləyicinin yerini mənə nə üçün demirsən” deyərək etirazımı bildirdim.

Mətbəxdən çıxmaq istəyən zaman qəflətən arxadan yaxınlaşaraq sacımdan dartdı və baş nahiyəmdən əli ilə bir neçə dəfə zərbə endirdi. Daha sonra mətbəxdən çıxaraq öz əşyalarımı götürdüm və restoranı tərk etdim. Baş vermiş həmin hadisə zamanı təqsirləndirilən şəxsə heç bir fiziki zor tətbiq etməmişəm və ona hər hansı bir xəsarət yetirməmişəm. Restoranın mətbəxində heç kim olmadığı üçün həmin hadisənin şahidi heç kim olmayıb. Baş vermiş hadisə təxminən 2-3 dəqiqə davam etdi”.

Bu cinayət işinə Nizami Rayon Məhkəməsində baxılıb.

Məhkəmənin hökmü ilə V. Babayeva 1000 manat miqdarında cərimə cəzasına məhkum edilib.

Xalq