Bakunews.az redaksiyasına Sabirabad rayon sakini Mustafayev Yaşar Ağavəkil oğlu tərəfindən daxil olan şikayətdə ciddi iddialar yer alıb. Şikayətçi bildirir ki, Azərbaycan Dövlət İqtisad Universitetinin müəllimi və eyni zamanda “Heba Consulting” MMC-nin rəhbəri Vüsal Quliyev tərəfindən aldadıldığını və ailəsinin yaşadığı evi itirdiyini iddia edir.

Yaşar Mustafayevin sözlərinə görə, 2016-cı ilin fevralında tərəflər arasında kredit müqaviləsi imzalanıb. Müqavilədə 211 min manat göstərilsə də, əslində o, cəmi 170 min manat nağd pul aldığını bildirir. Müqavilənin faizsiz göstərilməsinə baxmayaraq, realda borc 4% aylıq faizlə hesablanıb. 10 ay ərzində hər ay 6800 manat ödəyərək 68.000 manatı geri qaytardığını vurğulayan şikayətçi, ölkə xaricində olduğu vaxt Bakıdakı mənzilinin Vüsal Quliyev tərəfindən əlindən alındığını qeyd edir.

Söhbət Nərimanov rayonu, Mirəli Qaşqay küçəsində yerləşən 5 otaqlı, bazar dəyəri 800 min manat olan mənzildən gedir. Yaşar Mustafayev iddia edir ki, bu mənzil süni şəkildə ucuzlaşdırılaraq 255 min manata məhz Vüsal Quliyevin özünə satılıb. Məhkəmə prosesi yekunlaşmadan evdən çıxarıldıqlarını, hazırda isə kirayələrdə yaşadıqlarını bildirir.

Maraqlı məqam odur ki, Yaşar Mustafayev borcunu tam ödəməyə hazır olduğunu dəfələrlə bəyan etsə də, qarşı tərəf bu məsələyə müsbət yanaşmır. Vüsal Quliyevin isə “pulum, şirkətim, arxamda adamlarım var” deməklə özünü toxunulmaz hesab etdiyi bildirilir.

Şikayətçi ölkə rəhbərliyinə – Prezident İlham Əliyevə, Birinci vitse-prezident Mehriban Əliyevaya, Baş prokuror Kamran Əliyevə, Elm və Təhsil naziri Emin Əmrullayevə və UNEC rektoru Ədalət Muradova müraciət ünvanlayaraq, məsələnin obyektiv araşdırılmasını, mənzilinin geri qaytarılmasını və Vüsal Quliyevin fəaliyyətinə hüquqi qiymət verilməsini xahiş edir.

Bakunews.az olaraq bu məsələdə adları çəkilən tərəflərin mövqeyini işıqlandırmağa hazırıq. Şikayətdə yer alan ittihamlarla bağlı aidiyyəti dövlət qurumlarının araşdırma aparması vacibdir.