2025-ci ilin Azərbaycanda “Konstitusiya və Suverenlik ili” elan edilməsi ölkənin hüquqi və dövlətçilik tarixində mühüm mərhələ kimi qiymətləndirilir. Bu təqvim ili həm konstitusion dəyərlərin möhkəmləndirilməsi, həm də milli suverenliyin gücləndirilməsi baxımından simvolik məna daşıyır. Məhz bu kontekstdə yeni konstitusiya islahatları və mümkün referendum ehtimalı gündəmə gəlib.

Milli Məclisin Hüquq siyasəti və dövlət quruculuğu komitəsinin üzvü Bəhruz Məhərrəmov Modern.az-a açıqlamasında bildirib ki, Azərbaycanın Vətən müharibəsində və antiterror tədbirlərində böyük Zəfəri ilə Konstitusiyamızın bəyan etdiyi niyyətlər ərazi bütövlüyümüzün və suverenliyimizin tam bərpa olunması ilə tamlanıb. Onun sözlərinə görə, eyni zamanda yaranan yeni reallıqlar onsuz da daim inkişafda olan münasibətlər sisteminə və idarəçilik formatına da təsirsiz ötüşməyib, daha effektiv yanaşmaların mümkünlüyü perspektivini meydana çıxarıb.

“Əlbəttə, bu, qanunvericilik sistemində də islahatları zərurətə çevirib. Məlumdur ki, Zəfərimizdən sonra yaranan yeri reallıqda qanunvericiliyin təkmilləşdirilməsi istiqamətində önəmli addımlar atılmış və bu proses davam etməkdədir”.

Deputatın sözlərinə görə, Konstitusiya islahatlarına gəldikdə, zamanla ana qanunumuzda əlavə və dəyişikliklər edilib və bu proses cari və sonrakı dövrdə də istisna edilə bilməz:

“152-ci maddəyə əsasən, Azərbaycan Respublikası Konstitusiyasının mətnində dəyişikliklər yalnız referendumla qəbul edilə bilər. Referendum isə özlüyündə mürəkkəb prosesdir və hansı qaydada keçirilməsi imkanları və prosedurları konstitusion qaydada müəyyənləşib”,- deyə deputat qeyd edib.