Abşeron rayonunun Saray qəsəbəsində yerləşən "SARAY H" MTK ilə bağlı yeni tikinti iddiaları gündəmə gəlib. Belə ki, redaksiyamıza daxil olan məlumatlarda bildirilir ki, sözügedən ərazidə yüngül metal konstruksiyadan ibarət tikinti işləri aparılır. Tikintinin hansı məqsədlə həyata keçirildiyi məlum olsa da, işlərin sifarişçisi və ya icraçısı barədə məlumatın ictimaiyyətdən gizli saxlanıldığı iddia olunur.

Qeyd edək ki, son dövrlər Abşeron rayonu ərazisində aparıldığı iddia olunan qanunsuz tikintilərlə bağlı çoxsaylı müraciətlər daxil olur. İndi isə həmin siyahıya "SARAY H" MTK-nın da əlavə olunduğu bildirilir.

Xatırladaq ki, tikinti layihələrinə icazələrin verilməsi Azərbaycan Respublikasının Dövlət Şəhərsalma və Arxitektura Komitəsinin səlahiyyətlərinə aiddir. Bununla yanaşı, rayon ərazisində aparılan tikintilərin qanunvericiliyin tələblərinə uyğunluğuna nəzarət, qanunsuz tikinti faktları aşkar edildikdə onların dayandırılması və aidiyyəti dövlət qurumlarına məlumat verilməsi yerli icra hakimiyyəti orqanlarının vəzifələrindən hesab olunur.

Məhz bu səbəbdən Saray qəsəbəsində aparılan sözügedən tikinti işlərinin qanuniliyinin araşdırılması və müvafiq tədbirlərin görülməsi Abşeron Rayon İcra Hakimiyyətinin səlahiyyətləri çərçivəsində qiymətləndirilir.

Bununla yanaşı, müxtəlif mənbələrdə Abşeron rayonu üzrə aparıldığı iddia olunan qanunsuz tikintilər kontekstində rayonun Memarlıq şöbəsinin rəhbəri Kənan Babayev və İcra Hakimiyyətinin Ərazi idarəetmə və yerli özünüidarəetmə orqanları ilə iş şöbəsinin böyük məsləhətçisi Zahid Nəzərovun adlarının hallandığı bildirilir. Lakin qeyd olunan iddialarla bağlı hər iki vəzifəli şəxsin mövqeyi redaksiyamıza təqdim edilməyib.

Bakunews.az olaraq məsələ ilə bağlı Abşeron Rayon İcra Hakimiyyəti və Azərbaycan Respublikasının Dövlət Şəhərsalma və Arxitektura Komitəsinin rəsmi mövqeyini öyrənməyə çalışacağıq. Qarşı tərəfin cavab vermək hüququnu tanıyır və daxil olacaq rəsmi açıqlamanı olduğu kimi dərc etməyə hazır olduğumuzu bildiririk.