Bakunews.az-a daxil olan məlumata görə, Sədərək Ticarət Mərkəzində alverçilər və topdan alış məqsədilə gələn rayon ticarət şəbəkələrinin nümayəndələri saatlarla əraziyə buraxılmır.

Oxucular tərəfindən redaksiyamıza təqdim olunan video görüntülərdə açıq-aşkar görünür ki, səhər tezdən bazara gələn vətəndaşlar uzun müddət qapı qarşısında gözləməyə məcbur olurlar.

Şikayətçilərin sözlərinə görə, bazarın girişində idarəçilər tərəfindən tətbiq edilən qeyri-rəsmi məhdudiyyətlər ticarət prosesini ləngidir, alverçilərin işinə ciddi zərbə vurur:

- “Səhər saat 9-un yarısı gəlirik, amma bizi 11-12-yə qədər buraxmırlar. Camaatın başına oyun açırlar. Topdan alışa gələnlər də saatlarla qapıda qalıb, mal ala bilmir.”

Sakinlər və ticarət nümayəndələri sual edirlər:

- “Sədərək Ticarət Mərkəzində qanunlar kənarda, başqa qaydalarla idarəetməmi aparılır? Burada fəaliyyət hansı əsasla bu şəkildə tənzimlənir?”

Məsələ ilə bağlı aidiyyəti qurumların – İqtisadiyyat Nazirliyi, Antiinhisar və İstehlak Bazarına Nəzarət Dövlət Xidməti və Bakı Şəhər İcra Hakimiyyətinin vəziyyətə hüquqi qiymət verməsi istənilir.



Redaksiyamız məsələ ilə bağlı Sədərək Ticarət Mərkəzinin rəhbərliyinə rəsmi sorğu ünvanlayıb. Sorğuya cavab olaraq bildirilir ki, “Tədbirlərin məqsədi alıcıların rahatlığını təmin etməkdir”

Bakunews.az xəbər verir ki, Sədərək Ticarət Mərkəzinin rəhbərliyinə redaksiyamız tərəfindən göndərilən rəsmi sorğuya cavab olaraq, mərkəzin mətbuat katibi Kəmaləddin Qədim məsələ ilə bağlı açıqlama verib.

Kəmaləddin Qədimin sözlərinə görə, bazar ərazisində görülən tədbirlər ticarət mərkəzinə gələn alıcıların rahatlığını təmin etməyə yönəlib:

- “Bakı və ətraf rayonlardan Sədərək Ticarət Mərkəzinə üz tutan alıcıların rahatlığını təmin etmək məqsədilə, bazarda çalışan əməkdaşlara və işçilərə məxsus nəqliyyat vasitələri səhər saatlarında kənarda yaradılan dayanacaqlara yönləndirilir. Bu tədbirlər təxminən saat 09:30-a qədər davam edir.”

O əlavə edib ki, bu addımın əsas məqsədi bazara gələn alıcıların nəqliyyat sıxlığı ilə üzləşməməsi, alış-veriş mərkəzinə rahat gediş-gəlişin təmin olunması və ümumilikdə ticarət iştirakçılarının rifahının yüksəldilməsidir.

- “Tədbirlər bazar fəaliyyətinə maneə deyil, əksinə, alıcı və satıcıların təhlükəsiz və səmərəli şəkildə fəaliyyət göstərməsini təmin etmək üçündür,” – deyə mətbuat katibi vurğulayıb.