Quba-Xaçmaz Regional Təhsil İdarəsi, xüsusilə də İnzibati Təşkilat Sektorunun müdiri Fikrət Heybətov haqqında açıq mənbələrdə yayımlanan, faktlara və rəsmi sənədlərə söykənən çoxsaylı yazılardan sonra maraqlı bir mənzərə ortaya çıxıb. Faktlara cavab vermək əvəzinə, səhnəyə özlərini “jurnalist”, “bloger”, “ictimai fəal” kimi təqdim edən bir qrup çıxıb və Bakunews.az Müstəqil Xəbər Portalına qarşı guya “qərəzli və qarayaxma kampaniyası” aparıldığı iddiaları ilə sosial şəbəkələri doldurmağa başlayıb.

Diqqət çəkən məqam ondan ibarətdir ki, bu iddialarla paralel şəkildə həmin şəxslər Quba-Xaçmaz Regional Təhsil İdarəsini və xüsusən də Fikrət Heybətovu açıq-aşkar tərifləməyə başlayıblar. Halbuki ortada şəxsi mövqe deyil, açıq mənbələrdə yer alan məlumatlar, qanunvericilik tələbləri və cavabsız qalan ciddi suallar var.

Bu yazılardan açıq şəkildə görünür ki, özlərini ictimai fəal kimi təqdim edən Vüsal Başaratvi və Xaçmazxəbər.az adlı Facebook səhifəsi də aşkar görünən faktlara baxmayaraq, hansısa maraqlar naminə tərif ritorikasına üstünlük verib. Faktların üzərindən sükutla keçib, suallar əvəzinə alqış yazmaq “ictimai fəallıq”dırsa, onda bu anlayışın ciddi şəkildə yenidən izaha ehtiyacı var.

Eyni zamanda, “ictimai fəal” kimi təqdim olunan Tural Tağızadə özünə məxsus sosial şəbəkə hesabında və Cəlal Fərzəliyevə məxsus 7times.az saytının YouTube kanalında Bakunews.az-a qarşı şər və böhtan xarakterli video paylaşımları edib. Maraqlıdır ki, bu paylaşımlarda nə bir fakt təkzib olunur, nə də qaldırılan suallara hüquqi və məntiqi cavab verilir. Əvəzində isə klassik metod işə salınır: mövzu yox, mövzuya toxunan hədəf alınır.

Bir daha xatırladaq: Bakunews.az-ın dərc etdiyi materiallar şəxsi münasibətlər üzərində deyil, açıq mənbələrə, mövcud qanunvericiliyə və ictimai marağa əsaslanır. Əgər ortada problem yoxdursa, bu qədər “müdafiə səddi”nin qurulmasına ehtiyac nədən yaranır?

Nəticə etibarilə, faktlar ortadadır. Kimlərinsə tərif yazması faktları dəyişmir, kimlərinsə video çəkməsi isə sualları aradan qaldırmır.

Növbəti yazılarımızda bu “media qəhrəmanları”nın kim olduqları, hansı maraqlara xidmət etdikləri və ictimaiyyətə hansı “xidmətlər” göstərdikləri barədə çoxsaylı faktlarla geniş materiallar dərc ediləcək.
Oxucuya isə tövsiyəmiz sadədir: səsə yox, fakta baxın.