Bakunews.az xəbər portalı Daxili İşlər naziri Vilayət Eyvazov cənablarına müraciət edərək, jurnalistin peşə fəaliyyəti ilə əlaqədar təhqir və hədəyə məruz qalması faktının araşdırılması xahiş olunur.

Bildirilir ki, Bakunews.az-da dərc olunan “Xaçmazda vakansiya niyə gizlədildi? – 9 nömrəli məktəbdə biologiya dərsi kimə və necə verildi?” adlı araşdırma yazısı ölkə mediasında geniş rezonans doğurub və bir sıra xəbər saytları tərəfindən istinadla yayımlanıb. O cümlədən Reportyor.tv saytı da materialı Bakunews.az-a istinadən dərc edib.

Redaksiyanın açıqlamasına görə, məqalənin yayımlanmasından sonra yazıda adı hallanan Balaqadaşova Lamiyə müəllimin həyat yoldaşı Balaqadaşov Elşad tərəfindən +994 55 579 47 47 nömrəsindən həmkar jurnalistə zəng edilərək etik normalara zidd ifadələr işlədilib, açıq şəkildə təhqir və söyüşlər səsləndirilib. Telefon danışığı zamanı həm jurnalistin, həm də Bakunews.az xəbər portalının ünvanına hədələyici və təhqiramiz fikirlər ifadə olunduğu qeyd edilir.

Hadisə ilə bağlı dərhal Azərbaycan Respublikasının Daxili İşlər Nazirliyi-nin “102” Xidməti vasitəsilə rəsmi məlumat verildiyi, hüquq-mühafizə orqanlarının məlumatlandırıldığı vurğulanır.

Müraciətdə Azərbaycan Respublikasının Konstitusiyasına əsasən söz və mətbuat azadlığının dövlət tərəfindən təmin olunduğu xatırladılır, jurnalistlərin peşə fəaliyyətinə təzyiq göstərilməsinin və onların hədə-qorxu ilə susdurulmasına cəhd edilməsinin qanunvericiliyə zidd olduğu bildirilir.

Bakunews.az redaksiyası baş vermiş hadisənin obyektiv araşdırılmasını, hüquqi qiymət verilməsini və qanunauyğun tədbirlərin görülməsi üçün aidiyyəti qurumlara göstəriş verilməsini xahiş edir.

Redaksiya məsələ ilə bağlı araşdırmanın qanun çərçivəsində aparılacağına və jurnalistlərin təhlükəsiz fəaliyyətinin təmin olunacağına inam ifadə edir.