26 avqust – Beynəlxalq Azərbaycan Muğamı və Musiqisi Günü münasibətilə Xətai rayonunda milli musiqi sənətimizin təbliğinə həsr olunmuş təntənəli konsert proqramı təşkil edilib.

Xətai rayonu, Heydər Əliyev adına istirahət parkının amfiteatr səhnəsində keçirilən “Muğam axşamı” adlı tədbir Xətai Rayon İcra Hakimiyyəti, Bakı Şəhər Mədəniyyət Baş İdarəsi və Yeni Azərbaycan Partiyası (YAP) Xətai rayon təşkilatının birgə təşkilatçılığı ilə baş tutub.
Tədbirdə Xətai Rayon İcra Hakimiyyətinin başçısı Rafiq Quluyev, Milli Məclisin deputatları Vüqar Rəhimzadə, Razi Nurullayev, Müşfiq Məmmədli, YAP Xətai rayon təşkilatının sədri Ramil Mirzəyev, rayon ağsaqqalları, şəhid ailələrinin üzvləri, qazilər və ictimaiyyət nümayəndələri iştirak ediblər.
Açıq səma altında keçirilən mədəniyyət gecəsində Azərbaycanın tanınmış sənətkarları – Xalq artistləri Mələkxanım Eyubova və Nəzakət Teymurova, Əməkdar artistlər Teyyar Bayramov və Cabir Abdullayev, eləcə də digər xanəndələrin ifasında muğamlar, təsniflər və xalq mahnıları səsləndirilib.
Tədbir iştirakçıları tərəfindən böyük maraqla qarşılanan konsert proqramı Azərbaycan muğam sənətinin zənginliyini və milli musiqi irsimizin əhəmiyyətini bir daha nümayiş etdirib.
Xətai rayonunda sakinlərin asudə vaxtının səmərəli təşkili və milli-mənəvi dəyərlərin təbliği məqsədilə bu cür mədəni tədbirlərin keçirilməsi artıq ənənə halını alıb.