Şəhid Leytenant Bağırov Süleyman Loğman oğlu 1992-ci il fevralın 1-də (bəzi mənbələrdə yanvarın 25-i göstərilsə də sənədlərdə fevral ayının 1-i yazılıb) Sabirabad rayonunun Sərxanbəyli kəndində dünyaya göz açıb. Doğulduğu ildən valideyinləri ilə birlikdə Şirvan şəhərinə köçüb, Bağırovlar ailəsinin 3 oğul övladından ilki olan Süleyman, 1999-cu ildə Şirvan şəhərindəki şəhi̇d Məftun Osmanov adına 20 nömrəli məktəbin 1-ci sinifinə daxil olub. S.Bağırov eyni zamanda şahmat məktəbində təhsil alıb. O Azərbaycan dili və ədəbiyyatı, eləcə də tarix fənlərinə xüsusi maraq göstərib.

Dəfələrlə regional fənn olimpiadasında inşa yazı müsabiqələrinin qalibi olub. Süleyman şahmat sahəsində də çox böyük uğurlu nəticələri ilə seçilib. Beləki, 2005-ci ildə 14 yaş oğlanlar arasında dahi Azərbaycan şairi Nizami Gəncəvinin xatirəsinə həsr olunmuş 3-cü respublika şahmat turnirində 1-ci yeri tutub. Davamında, 2005-ci ildə 12 noyabr Konstitusiya gününə həsr olunmuş şahmat yarışlarında və Xocalı faciəsinə həsr olunmuş şahmat turnirində 1-ci yerə layiq görülüb. 2010-cu ildə 20 nömrəli məktəbi bitirdikdən sonra Süleyman Bağırov elə həmin il Bakı Mədəniyyət və İncəsənət Universitetinin Sənətşünaslıq fakültəsinə daxil olub. O tələbəlik illərində universitetin Tələbə Gənclər Təşkilatının üzvü olmaqla yanaşı həm də ictimai əsaslarla bir neçə televiziya kanalları ilə əməkdaşlıq edib.2015-ci ildə universiteti bitirdikdən sonra Ağdam rayonunun N saylı hərbi hissəsində həqiqi xidmətə başlayıb. Burada da Azərbaycan Silahlı Qüvvələri arasında baş tutan şahmat turnirində 1-ci yerə layiq görülüb.

Süleyman Bağırov xidməti dövründə hərbi təhsilə cəlb edilib, o Cəmşid Naxçıvanski adına Hərbi Liseydə oxuyaraq leytenant rütbəsini qazanıb.
Süleyman ilk dəfə hərbi xidməti dövründə motoatıcı olaraq müxtəlif hərbi təlimlərdə iştirak edib. Sərrast atıcı hədəflərin düzgün nişan alınmasında və əməliyyatların yerinə yetirilməsində əsl hərbçi fəallığı göstərib.2016-cı ildə Azərbaycan tarixinə 4 günlük müharibə kimi daxil olan Aprel döyüşlərində rəşadətlə vuruşan Azərbaycan Silahlı Qüvvələri arasında məhz Süleyman Loğman oğlu Bağırov da var idi. O mövqelərimizin düşmən qüvvələrindən azad edilməsində böyük mərdliklə vuruşub. Motoatıcı S. Bağırov peşəkar döyüşçü ruhunda hərbi əməliyyatları həyata keçirməklə erməni silahlılarının xeyli hərbi texnikasını və canlı qüvvəsini məhv edib. Qeyd edək ki, general-mayor Polad Həşimov Süleyman Bağırovun komandiri idi.S. Bağırov ordu sıralarında təxris edildikdən sonra Şirvan şəhərindəki Oba marketlər şəbəkəsində administrator vəzifəsində çalışıb. Eyni zamanda aktiv gənc olduğu üçün Şirvan Gənclər Evində könüllü şəkildə aktiv fəaliyyət göstərib.

Şirvan Gənclər Evinin rəhbəri Əfqan Həsənov müsahibəsində Süleyman haqqında deyir: “Süleyman olduqca çox aktiv gənc idi, Gənclər Evinin bir çox tədbirlərində fəal iştirak etmişdir. Əsasən də intellektual yarışlarda və şahmat turnirlərində yüksək nəticələri ilə seçilirdi. Hətta, şeirlər də yazardı Süleyman. Bir sözlə hər tərəfli gənc idi və o bizim yaxın dostumuz idi…”Aprel döyüşlərin ən ağır sınaqlarından çıxmış Süleyman hər an vətənin çağırışına hazır idi.

2020-ci ilin 27 sentyabrında Ermənistan hərbi qüvvələrinin atəşkəsi pozaraq hücum təxribatı həyata keçirməsinə cavab olaraq əks-hücum əməliyyatlarının başlanmasının ilk dönəmləri zamanı, daha dəqiq desək 29 sentyabr tarixində Süleyman Bağırov könüllü şəkildə cəbhəyə yola düşüb. Mürəkkəb relyefə malik olan Qarabağda aparılan hərbi əməliyyatlarda uğurla iştirak edən Süleyman Cəbrayılın düşmən tapdağından azad olunmasında rəşadətlə vuruşub. O Füzuli istiqamətində döyüş mövqeyini dəyişərkən qəhrəmancasına şəhid olmuşdur! 8 oktyabr şəhi̇dlik zirvəsini fəth etməsi xəbəri gələn Süleyman Bağırov 2020-ci il noyabrın 13-də yaşadığı Şirvan şəhərinə gətirilərək böyük izdihamla Şirvan şəhər şəhidlər xiyabanında torpağa tapşırılıb.

Vətənin bütövlüyü uğurunda sinəsini sipər etmiş şəhi̇d leytenant Süleyman Bağırov 2019-cu ilin 15 dekabr tarixində ailə qurmuşdu. 1992-ci ildən Şirvan şəhərində müxtəlif ünvanlarda bu günə qədər kirayə mənzillərdə yaşayan valideyinlərinə və həyat yoldaşı Mehribana: “Mütləq sizə dönəcəyəm” – demişdi.

Vətənin erməni işğalından azad edilməsi uğrunda qanı ilə qəhramanlıq dastanı yazan 28 yaşlı şəhi̇d leytenant Süleyman Bağırovun yoxluğunu heç nə əvəz etmir. Anası Nailə xanım və atası Loğman bəy Süleymanın yoxluğu ilə barışa bilməsələr də onlar çox böyük fəxarət hissi keçirirlər. Çünki, vətənpərvər ruhda böyütdükləri Süleymanın Qarabağın azad olunması arzusunu elə Süleyman özü şəhid silahdaşları ilə reallaşdırdı, Qarabağ azad oldu, Azərbaycana qovuşdu!

Süleymanın valideynlərinin daha bir təsəllisi də var – Süleymanın şəhidlik zirvəsinə yüksələrkən Allaha, dövlətə, vətənə əmanəti olan 2021-ci ilin yanvar ayının sonu, fevralın ilk günlərində dünyaya gələcək körpəsinin yadigar nəfəsi, Süleymandan yadigar bir körpə səsi!
Süleyman Bağırov ölümündən sonra Prezident İlham Əliyevin sərəncamı ilə 2020-ci il 15 dekabr tarixində “Vətən uğrunda” medalı ilə təltif edilib.
Allahdan bütün şəhidlərimizə rəhmət diləyirik və şəhidlərimizin əziz xatirəsini böyük hörmət və ehtiramla yad edirik!


bakunews.az