Xırdalan şəhər 17 saylı körpələr evi - uşaq bağçasının keçmiş, Digah qəsəbəsi 6 saylı uşaq bağçasının hazırkı müdiri Fəranə Məhərrəmovanın serial kimi "sərgüzəştləri" davam edir.

"DogruXeber.az" bildirir ki, redaksiyamıza bu dəfə Fəranə Məhərrəmovanın daha bir neçə səs yazıları daxil olub.

O, səs yazıları ki, birində Fəranə xanım valideynləri toplayıb, bağçada müəyyən təmir işlərinin aparılması üçün pul yığılmalı olduğundan bəhs edir. Digər səs yazısında isə bağçada fond pulu yığdığı, eləcə də valideynlərlə qrup-qrup görüşüb pul istədiyi barəsində rəhbər şəxslərə də məlumat verdiyindən danışır.

Qeyd edək ki, uşaq bağçalarının tabe olduğu qurum, Eşqi Bağırovun rəhbərlik etdiyi Məktəbəqədər və Ümumi Təhsil üzrə Dövlət Agentliyidir.

Eşqi Bağırovun özünün də barəsində yerli saytlarda kifayət qədər tənqidi yazılar və qanunsuz əməlləri barəsində məlumatlar var, amma "gözün üstə qaşın var" deyəni yoxdur. Yəqin, bundan ilhamlanaraq, barəsində korrupsiya, rüşvət faktları olan, dövlət müəssisəsini öz evi kimi idarə edən işçilərinə də bu gün lazım olduğundan da artıq sərbəstlik verib.

Əgər, Fəranə Məhərrəmova bütün yığılar pullar barəsində rəhbərliyə də bildirdiyini deyirsə, belə çıxır ki, Fəranə Məhərrəmovanın, Günay Hacıyevanın, Arzu Məmmədovanın, Lənkəran şəhər 12 saylı körpələr evi - uşaq bağçasının müdiri Zəminə İsayevanın hazırkı fəaliyyətləri onun ürəyincədir.

O, Zəminə İsayeva ki, bağçada qanunsuz pullar yığdırdığı azmış kimi, işçilərinə qarşı amansız , "faşistcəsinə" davranışları ilə gözlərinin yaşını tökməklə, onlara "mənəm" prinsipini nümayiş etdirib, gözlərini qorxutmağa çalışır.

"Kanal14" YouTube kanalında təqdim etdiyimiz səs yazısında sözügedən 12 saylı uşaq bağçasında kanalizasiya üçün 5 manat pul yığılmasından da söhbət gedir.

O, bağça ki, siçovullar meydanda sərbəst gəzişir, xalçaların çirki ekrandan belə nə qədər iyrənc görünür, döşəmə taxtaları biri-birindən aralı, çürümüş, qəzalı vəziyyətdə...

Qaldı ki, yeməklərinə, bir boşqab bulanıq su, 2-3 xırda kubik şəklində doğranmış kartof, 3-4 makaron dənəsi. Vəssalam...

Yığılan pullar: lampa almaq üçün, kanalizasiya üçün, San Epidemiologiya Mərkəzindən arayış almaq üçün... üçün... üçün...

Əlbəttə ki, bütün bunlar barəsində məlumatları dərc etmişik də, "Kamalın zamanı" proqramında yayımlamışıq da, Elm və Təhsil Nazirliyinə rəsmi sorğu şəklində göndərmişik də.

Nə dəyişib?

İki həftə əvvəl 5 uşaq bağçasının müdirləri işdən çıxarılıb.

Hər halda, nazirliyin yayımlatdırdığı rəsmi məlumatda belə yazılıb. Amma, nə bağçaların nömrəsi bilinir, nə işdən çıxarılan müdirlərin adları, nə də işdən çıxarılma səbəbləri...

Bu isə o, deməkdir ki, heç nə dəyişməyib.

Bəlli ki, qurum bu cür formal xarakter daşıyan xəbərlərlə ictimaiyyətin diqqətini yayındırmağa çalışır.

Reallıq isə budur ki, aylardır korrupsiya əməlləri araşdırdıqca "matruşka" kimi çoxalan, kollektivlə işləmə bacarığı belə olmayan, kollektiv arasında ayrıseçkilik, inciklik yaradan, haqq deyəni işdən çıxarmaqla, məhkəməylə, prokurorluqla hədələyən Fəranə Məhərrəmova, Zəminə İsayeva və digər bu cür çalışan bağça müdirləri, məktəb direktorları maneəsiz şəkildə öyrəşdikləri üsulla fəaliyyətlərini davam etdirirlər.

P.S: Qeyd edək ki, yuxarıda adları çəkilən bağça müdirləri barəsində aidiyyatı qurum qanuni tədbir görməyə deyil, susmağa üstünlük verdiyi üçün, artıq tərəfimizdən rəsmi müraciət və səs yazıları Azərbaycan Respublikası Prezidentinin Administrasiyasının humanitar siyasət məsələləri şöbəsinin müdiri Fərəh Əliyevaya göndərilib

Mövzunu davam etdirəcəyik.

Redaksiyamız hər kəsin söz haqqını tanıyır.

DogruXeber.az