Qısa müddət əvvəl Gəncə Dövlət Universitetinin nəzdində fəaliyyət göstərən Regional Kollecdə müəllim kollektivi tərəfindən direktor Xoşqədəm Xudiyevanın vəzifəsindən azad olunması tələbi ilə etirazların baş verdiyi barədə məlumatlar yayılmışdı. Həmin dövrdə redaksiyamıza daxil olan etibarlı mənbələrin məlumatına əsasən, Elm və Təhsil Nazirliyi və Elm və Təhsil Agentliyində kollecdə yaranmış narazılıqların, idarəçiliklə bağlı çoxsaylı şikayətlərin və kollektivin mövqeyinin nəzərə alınaraq direktorun vəzifədən azad edilməsi məsələsinin müzakirə olunduğu bildirilirdi.

İndi isə redaksiyamıza daxil olan yeni məlumatlarda daha ciddi iddialar yer alır.

Belə ki, mənbələrin iddiasına görə, Xoşqədəm Xudiyeva kolleci tərk edərkən müəssisəyə məxsus olduğu bildirilən bəzi əmr kitablarını da özü ilə aparıb. İddia olunur ki, sözügedən sənədlər hazırda kollecdə mövcud deyil.

Əgər bu məlumatlar öz təsdiqini taparsa, dövlət təhsil müəssisəsinə məxsus rəsmi sənədlərin müəssisədən kənarlaşdırılması ilə bağlı ciddi hüquqi və inzibati suallar yarana bilər. Çünki əmr kitabları dövlət müəssisəsinin rəsmi sənədləri hesab olunur və onların saxlanılması, qorunması və istifadəsi qanunvericiliyin tələblərinə uyğun həyata keçirilməlidir.

Məzuniyyətdə xidməti avtomobildən istifadə ilə bağlı da suallar yaranır

Redaksiyamıza daxil olan digər məlumatlarda isə Gəncə Dövlət Universitetinin nəzdində fəaliyyət göstərən Regional Kollecin direktoru Xoşqədəm Xudiyevanın məzuniyyətdə olduğu müddətdə dövlətə məxsus xidməti avtomobildən istifadə etdiyi iddia olunur.

Bu məlumatların doğru olduğu halda bir sıra mühüm suallar meydana çıxır:

• Məzuniyyətdə olan vəzifəli şəxs hansı hüquqi əsasla xidməti avtomobildən istifadə edib?
  
• Dövlət əmlakından bu formada istifadəyə kim tərəfindən icazə verilib?
  
• Avtomobilin yanacaq, sürücü və digər xərcləri hansı maliyyə mənbəyi hesabına qarşılanıb?
  
• Bu istifadə dövlət əmlakının təyinatı üzrə və səmərəli istifadəsi prinsiplərinə uyğundurmu?
  

Məlum olduğu kimi, xidməti avtomobillər dövlət qulluqçularının şəxsi istifadəsi üçün deyil, yalnız xidməti vəzifələrin icrası məqsədilə ayrılır. Məzuniyyət dövründə xidməti fəaliyyət həyata keçirilmədiyi halda xidməti avtomobildən istifadə olunması barədə iddiaların təsdiqlənəcəyi təqdirdə, dövlət əmlakından təyinatı üzrə istifadə edilməməsi ilə bağlı hüquqi qiymətləndirmənin aparılması zərurəti yarana bilər.

Aidiyyəti qurumların mövqeyi maraq doğurur

Yuxarıda qeyd olunan bütün məlumatlar hazırda redaksiyamıza daxil olmuş iddialara əsaslanır və onların rəsmi şəkildə təsdiqi hələlik mövcud deyil.

Bununla belə, məsələ ictimai maraq doğurduğundan Elm və Təhsil Nazirliyi, Elm və Təhsil Agentliyi, eləcə də Gəncə Dövlət Universitetinin məsələ ilə bağlı araşdırma apararaq ictimaiyyətə rəsmi açıqlama verməsi məqsədəuyğun görünür.

Əgər səsləndirilən iddialar təsdiqini taparsa, qanunvericiliyin tələblərinə uyğun hüquqi qiymət verilməsi vacib olacaq. Əks halda isə aidiyyəti qurumların rəsmi mövqeyi ictimaiyyətdə yaranmış sualların aradan qaldırılmasına xidmət edəcək.

Qeyd edək ki, məqalədə yer alan məlumatlar redaksiyaya daxil olmuş iddialara əsaslanır. Adı çəkilən şəxslərin və aidiyyəti qurumların mövqeyini dərc etməyə hazırıq və onların təqdim edəcəyi cavab və izahlar olduğu kimi yayımlanacaq.