Qəbələ Dövlət Peşə Təhsil Mərkəzində aparılan təmir işləri ətrafında yaranmış mübahisə yeni açıqlamalarla daha da böyüyür. Təmir işlərində çalışan Röyal Zamanov BakuNews.az-a bildirib ki, “Lider Line” MMC-nin rəhbəri kimi təqdim etdiyi Namizəd Əsgərovun dəvəti ilə dövlət təhsil müəssisəsində işə başlayıb, lakin görülən işlərin müqabilində onun və digər işçilərin ümumilikdə 4500 manat əməkhaqqı ödənilməyib.

Röyal Zamanovun sözlərinə görə, o, tanışı vasitəsilə Namizəd Əsgərovla əlaqə yaradıb və tərəflər Qəbələ Dövlət Peşə Təhsil Mərkəzində təmir işlərinin görülməsi barədə razılığa gəliblər. İddiaya əsasən, işçilərə hər həftənin bazar günü görülən işlərin haqqının ödəniləcəyi və onlarla rəsmi müqavilə bağlanacağı vəd edilib.

Zamanov bildirir ki, məhz bu vədə inanaraq özü ilə yanaşı bir sıra usta və fəhlələri də işə dəvət edib.

Onun sözlərinə görə, ilk həftə görülən işlərin pulu ödənilib və o da aldığı vəsaiti işçilər arasında bölüşdürüb. Lakin sonrakı həftələrdə ödənişlərin sistemli şəkildə verilməsi dayanıb.

Şikayətçinin iddiasına görə, sonradan onlara müxtəlif vaxtlarda 200, 400 və 500 manatlıq ayrı-ayrı məbləğlər göndərilib, lakin əsas əməkhaqqının ödənilməsi davamlı olaraq təxirə salınıb.

Röyal Zamanov bildirir ki, Namizəd Əsgərov onlara yarımçıq işləri tamamlamağı, bundan sonra bütün borcun birdəfəlik ödəniləcəyini deyib.

“İşi bitirin, pulunuzu birlikdə verəcəyəm” vədi isə, şikayətçinin sözlərinə görə, nəticədə yerinə yetirilməyib.

Zamanovun açıqlamasına əsasən, vəziyyətin şübhəli olduğunu düşünən bir sıra ustalar işi yarımçıq qoyaraq ərazidən uzaqlaşıblar. Buna baxmayaraq, özü, iki usta və bir fəhlə işi davam etdirib.

Şikayətçi bildirir ki, onlar təxminən 3200 kvadratmetr emulsiya işi, 360 kvadratmetr kafel-metlax işi, həmçinin malyar və digər tamamlama işlərini başa çatdırıblar.

Onun iddiasına görə, bu müddətdə işçilərə əsas əməkhaqqı əvəzinə yalnız gündəlik yemək xərcləri üçün müəyyən vəsaitlər göndərilib və hər dəfə eyni arqument səsləndirilib: işi başa çatdırın, bütün hesab bağlanacaq.

Lakin iş tamamlandıqdan sonra vəziyyətin tam əks istiqamətdə dəyişdiyi bildirilir.

Röyal Zamanovun sözlərinə görə, əməkhaqqını tələb etdikdə əvvəlcə ona bir neçə gün gözləməsi xahiş olunub. Namizəd Əsgərovun maliyyə çətinliyi yaşadığını bildirərək ödənişi həftənin sonunadək edəcəyini dediyi, daha sonra isə həmin tarix də çatdıqda ödənişin yenidən başqa günə keçirildiyi iddia olunur.

İşçilərin buna etirazından sonra isə, Zamanovun iddiasına görə, məsələ artıq tamam başqa məcraya yönəlib.

Şikayətçi bildirir ki, Namizəd Əsgərov Qəbələ Dövlət Peşə Təhsil Mərkəzində Dağlar müəllim kimi tanınan vəzifəli şəxslə əlaqə saxlayaraq işçilərin müəssisədən çıxarılmasını istəyib.

Bundan sonra onların gördüyü işlərin keyfiyyətsiz olduğu bildirilib və məktəbin ərazisini tərk etmələri tələb olunub.

Röyal Zamanov isə bu mövqeni qəbul etmədiyini deyir:

“Əgər gördüyümüz iş pis idisə, bunu birinci həftədə deyərdilər. Biz təxminən iki ay işlədik. Niyə məhz pulumuzu tələb etdiyimiz vaxt işimizin pis olduğu ortaya çıxdı?”

Şikayətçinin sözlərinə görə, o, gördükləri işlərin sahəsini hesablayaraq Namizəd Əsgərova təqdim edib. Qarşı tərəf isə hesablamaların artıq göstərildiyini bildirib. Zamanov həmin halda obyektə birlikdə gedərək görülən işlərin yerində ölçülməsini təklif etdiyini, lakin bu təklifinin qəbul olunmadığını iddia edir.

Hazırda, onun dediyinə görə, bir fəhlənin, bir ustanın və özünün birlikdə 4500 manat alacağı qalıb.

Məsələnin daha ciddi tərəfi isə işçilərin dövlətə məxsus təhsil müəssisəsində hansı hüquqi əsasla çalışdırılması ilə bağlıdır.

Röyal Zamanovun sözlərinə görə, onlara əvvəlcədən rəsmi müqavilə bağlanacağı bildirilsə də, faktiki olaraq işlər müqavilə rəsmiləşdirilmədən görülüb.

Əgər bu iddia təsdiqini taparsa, ortaya bir sıra mühüm suallar çıxır:

Dövlət təhsil müəssisəsində təmir işlərini faktiki olaraq hansı şirkət həyata keçirib? “Lider Line” MMC ilə Qəbələ Dövlət Peşə Təhsil Mərkəzi arasında hansı müqavilə və ya satınalma sənədi mövcuddur? Tikintidə çalışan ustalar hansı hüquqi əsasla müəssisəyə buraxılıb? İşçilərlə əmək və ya xidmət müqaviləsi niyə bağlanmayıb? Görülmüş işlərin təhvil-təslim sənədləri varmı? İşçilərin əməyinin haqqı hansı vəsaitdən ödənilməli idi?

Röyal Zamanov redaksiyaya bildirib ki, iddialarını təsdiqləyə biləcək materiallar da mövcuddur. Onun sözlərinə görə, görülən işlərin videogörüntüləri, Namizəd Əsgərov tərəfindən göndərildiyi bildirilən ödənişlərin bank çekləri, eləcə də həmin vəsaitlərin ustalara verilməsi barədə şəxsi qeydləri saxlanılır.

Belə olan halda “iş pis görülüb” arqumentinin yalnız əməkhaqqı tələb edildikdən sonra ortaya çıxmasının səbəbi də ayrıca izah tələb edir.

Əgər iş doğrudan da keyfiyyətsiz idisə, bu barədə akt tərtib edilibmi? İşçilərə əvvəlcədən yazılı irad bildirilibmi? Qüsurların aradan qaldırılması tələb olunubmu? Yoxsa “keyfiyyətsiz iş” ifadəsi görülmüş işlərin pulunun ödənilməməsi üçün sonradan ortaya atılmış arqumentdir?

Ən mühüm məsələ isə budur: dövlət müəssisəsində aylarla çalışdığı bildirilən şəxslərin müqaviləsiz işləməsinə kim və hansı əsasla şərait yaradıb?

BakuNews.az məsələdə adı hallanan “Lider Line” MMC-nin rəhbəri Namizəd Əsgərovun, Qəbələ Dövlət Peşə Təhsil Mərkəzinin rəhbərliyinin və digər aidiyyəti şəxslərin mövqeyini dərc etməyə hazırdır.

Şikayətdə səsləndirilən iddiaların hüquqi qiymətləndirilməsi isə aidiyyəti dövlət qurumlarının araşdırmasının predmetidir.

BakuNews.az mövzunu diqqətdə saxlayacaq.